Kommune Qeqertalimmi Partiit Inuit Ataqatigiit, Atassut, Siumullu 2021-mut missingersuutit qanoq isikkoqarnissaat isumaqatigiissutigaat.

Kommune Qeqertalimmi Partiit Inuit Ataqatigiit, Atassut, Siumullu 2021-mut missingersuutit qanoq isikkoqarnissaat isumaqatigiissutigaat.

Kommune Qeqertalimmi kommunalbestyrelsi tamarmiusoq isumaqatigiippoq 2021-mi missigersuutit qanoq isikkoqassanersut. Kommunalbestyrelsip pingaartippaa sanaartugassat annertuut isumaqatigiissutigineqareersullu ingerlaannassasut, meeqqat atuarfianik sanaartornermi tulleriissaarineq ingerlaannassasoq, meeqqeriviliortiternerit, utoqqaat illuanik sanaartorneq, utoqqaat pisinnaanerusut inissiassaanik sanaartorneq, innartuutillit najugaqatigiiffissaanik sanaartorneq, inissialiortiternerit pitsanngorsagassallu assigiinngitsut ingerlanneqassasut.

Missigersuutit imatut agguataagaapput.

2021-imi Kommune Qeqertalimmi ingerlatsinermut aningaasartuutit 611 mio.- kr-niussapput taakkunannga sanaartugassat 75 mio kr.-nit atorneqassallutik, isertitassat 601 mio kr.-nik annertussuseqassasut naatsorsuutigineqarpoq. Taakkunannga selskabsskatip Inatsartuni appartinneqarnerata kinguneranik kiisalu coronavirusip inuutissarsiornermut sunniutaasa kinguneranik isertitassat annikinnerulertussaanerat naatsorsuutigineqarmat. Kommunalbestyrelsimi Partiit gruppe-ni siulittaasui isumaqarput 2021-mi kommunalbestyrelsi 10 mio kr.-ninik amigartoorutilimmik missigersuusiorsinnaanera illersorneqarsinnaasoq ukiut kingulliit pingasut naatsorsuutinik sinneqartoorluarnerup kingunerisaanik aningaasat atoriaannaat isumannaatsumik amerlassuseqalernissaat anguneqarsimammat.

Kommune Qeqertalimmi aaqqissuussaanerup nutaap atuunnerani allaffissornikkut pisariillisaanerit suliniutigineqarsimasut kinguneqarluartut takussutissaqarpoq, ukioq manna allaffissornermi aningaasartuutit 9 mio. Kr.-ninik annikinnerulernernissaat naatsorsuutigineqarmat.

Suliniutit pitsanngorsagassallu ingerlateqqissavagut ingerlassimasagut, ineriartorteqqitassallu pitsaasumik tullissatsinnut tunniunneqarnissaat tamatta kissaatigisorujussuuarput, Taamattumik pitsaasumik tamatta isumaqatigiissuteqarnissarput akisussaaqatigiilluartumillu ingerlaqatigiissimanerput tullissatsinnik malugineqassasoq tamatta kissaatigaarput. Innuttaasut atukkaminnik pitsangorsaanissamik akisussaaffimmik tiguseqataanissaat pingaartittuarsimavarput kissaatigalugulu akisussaaffik tunniunneqartoq nagillugu qanimut suleqataanerit ingerlateqqinneqassasut.

Kommunalbestyrelse-mi partiit tamarmik pingaartitartik ingerlateqqissavaat tassalu atugarissaarneq siunertaralugu inissialiortiternernik ersarissumik pilersaarusiornerit, aammalu kommune Qeqertalimmi ukiut tulliuttut 40-rut ingerlaneranni illoqarfinni nunaqarfinnilu tamani eqqakkat kuuffiissaanik pilersaaruteqarnerup naginneqarnissaa, meeqqat atuarfiini angusat qaffassarnissaanik atuanngitsoortarnerillu apparsarnissaanik suliniutit ingerlaannarnissaat, meeqqat inuusuttullu atugarissaarnerulernissaanik anguniakkat ilanngullugit.

Kommune Qeqertalimmi Partiit siulittaasui: