Kangaatsiami atuartut Ipadinik agguaaffigineqarmata maanna Kommune Qeqertalimmi atuartut tamakkerlutik ipaditaarput.

28. oktober 2020

Kangaatsiami Atuarfiup Pisortaanera/ Suliassaqarfik INUIT-mi aqutsisoq Sussi Adelholm suleqatini peqatigalugit IPadinik agguaapput. Assit allaatigisap naanerani allat takukkit.

Ataasinngorneq 26. oktober 2020 Kangaatsiami atuartut 82-sit persuarsiornartumik ipadinik agguaaffigineqarnerani 1. Viceborgmesteri Otto Jeremiassen tikilluaqqusilluni oqaaseqarpoq, Atuarfiup pisortaanera Sussi Adelholm ilinniartitsisut peqatigalugit atuartut eqimattanut marlunnut avillugit agguaapput.

Attaveqaatit atorlugit borgmesteri Ane Hansen, 2. viceborgmesteri Hans Aronsen, atuarfeqarnermut ataqatigiissaarisoq Nivikka Rosing attaveqaat skype aqqutigalugu peqataapput. Ulloq tamanut nuannersumik angusaqarfiulluartumillu ingerlanneqarpoq. Kangaatsiap atuarfiani ilinniartitsisut atuartullu Ipad atuartitsinermi atornissaanut qilanaaralugu ulloq atuarfiusoq naammassivaat.

Nuna tamakkerlugu suliuniut "Kivitsisa"

Nunatsinni meeqqat atuarfiisa maanna inissisimaffiat aallaavigalugu, nuna tamakkerlugu atuarfinni qaffassaanissaq siunertaralugu kommunit tamakkerlutik suliniut “Kivitsisa” peqataaffigivaat.

“Kivitsisa” Institut for læring og Uddannelsesstyrelsen (ilinniartitsinermik ilisimatusarnermik ingerlatsivik aammalu ilinniagaqarnermut aqutsisoqarfik) qanimut suleqatigalugit ingerlanneqarpoq. Kivitsisap ilusiligaanera kommunini atuarfiit killiffiinut naleqqussarneqarluni ingerlanneqarpoq. Kivitsisap ingerlannerani kommunini tamani atuartut tarmik Ipadimik atuillutik atuartinneqalernissaat anguniagaavoq.

Kommune Qeqertalimmi atuartunut Ipad atorlugu atuartitsineq tamakkiisumik aallartisalerpoq.

Maanna Kommune Qeqertalimmi atuartut tamarmik ipaditaarnerat nammassineqarpoq. Tullinnguuppoq ilinniartitsisut atuartullu tamakkiisumik iPadi atorlugu atuilernissaq, atuartut iPadimik atuinerannik piginnaanngorsaanissaq.

Kommune Qeqertalimmi atuarfinni Ipadit atuartitsissutit atorneranni Kivitsisami sulisunit, atuarfinni Ipad mentorinit, Atuarfeqarnermut ataqatigiissaarisumit, kommunimi IT-mik suliaqartunit ataqatigiissarneqarpoq, illoqarfinni Aasianni, Qeqertarsuarmi, Qasigiannguani Kangaatsiamilu atuarfinni ilinniartitsisunik aalajangersimasunik mentoreqarpoq, mentorit illoqarfigisaminni nunaqarfinnilu ilinniartitsisoqatiminnut Ipad atorlugu atuartitsinermi sakkussanik tunioraallutillu, ilitsersuisarput siunnersuillutillu.

”Kommune Qeqertalimmi Ipadimi mentorit ikiortit ingerlalluarput, ipaditaartut kingulliit Iginniarfik, Attu, Niaqornaarsuk Ikerasaarsummilu ilinniartitsisut Kangaatsiami mentorinit tikinneqassapput.
Mentorit ikiortit Webinari internetsikkut isumasioqatigiilluni atorneqartartoq atorlugu isumasioqatigiisinneqartarput, Webinari ingerlanneqarnerani Kivitsisami sulisut ataqatigiissaarisuusarput.” – Taama oqaaseqarpoq Nivikka Rosing, Atuarfeqarnermut ataqatigiissaarisoq. 

Ipadi atorlugu atuartitsinermi “Kivitsisa” anguniagaani naatsorsuutigineqarpoq atuartoq siunissami ima ittoq pilersinneqassasoq:

-Misileraasoq, misissuisoq, sanaartortoq, pilersitsisartoq –taakkualu atorlugit ilikkarsarnermini ingerlateqqissinnaalissagai.

Atuartut Ipadi atorlugu atuarnerminni misissuinertaqarnerusumik sammisanullu siunnerfilersugaanerusumik suliaqartassapput– aamma atuartitsinertaa eqqarsaatigalugu. Taamatut atuartitsinermi atuartut kaammattorneqassapput ilikkagaqarnerusinnaalernissamut, suliassanik assigiinngitsunik suleqatigiinnernut, nutaaliornernut pilersitserusulernernullu. Ilikkagassatut qitiutinneqarput atuartut nassaarsiorsinnaanerat digitaliusunillu saqqummiussassanik pilersitsisinnaanerat. Atuartitsinermi ipadit atuutilernerat atuarfinnut inatsimmut, Atuarfitsialammut naapertuupput.

Atuartut Ipad internetsimut attavilerlugu imaluunniit internetsimut attaveqartinnagu atuarnerminni atorsinnaavaat.

”Nuannaarutigivara Kommune Qeqertalimmi maanna atuartut tamarmik Ipadinik peqalerneranni Nuna tamakkerlugu suleqatigiilluni atuarfinni qaffassaaniarluni suleqatigiissutigisatsinni alloriarneq annertooq pimmat. Kommune Qeqertalimmi atuartut ipadit atuarnissinni atorluarisigit, ilinniartitsisut atuartitsinissinni atuartitsissutitut atorluarisigit, atuartuutillit atuartuutissi ipadini suliaanut alapernaalluarisi tamassilu pilluangaaritsi.”   - Taama oqaaseqarpoq borgmesteri Ane Hansen, Kommune Qeqertalik.

”Kivitsisa aqqutigalugu anguniarneqarpoq meeqqat atuarfianni ilinniartitsinerup pitsanngorsarnissaa. iPadsit agguaanneqarpata internetikkullu attaveqarnerit pitsanngortinneqarlutik – eqqortumillu atuinerit ingerlanneqarpata – atuartitsinermi periarfissarpassuit soqutiginartut nutaat ammaanneqassapput.”

Kivitsisa nittartakkami quppernera alakkaruk linki toorlugu:

www.kivitsisa.gl

Assit Kangaatsiami atuartut Ipaditaarnerannit.