Aalisarnermut, Piniarnermut Nunalerinermullu Naalakkersuisoqarfiup nuannaarutigalugu nalunaarutigissavaa maanna sunngiffimmi piniarsinnaanermut allagartaq qarasaasiakkut imminut sullilluni www.sullissivik.gl-ikkut toqqaannaq akilerneqarsinnaanngormat.
Sunngiffimmi piniarsinnaanermut allagartaq www.sullissivik.gl-imut iserluni nem-id atorlugu akilerneqarsinnaavoq, taamaalilluni sunngiffimmi piniarsinnaanermut allagartaq inniminnerneqarsinnaavoq, akilerlugu aammalu anisillugu naqinneqarsinnaalluni. Piniarsinnaanermut allagartami takuneqarsinnaassaaq akilerneqarsimasoq. Taamatuttaaq aamma piniarsinnaanermut allagartat girokort-i netbank atorlugu imaluunniit allakkerisarfikkut akiliisimaguit takuneqarsinnaassalluni.
Naalakkersuisoqarfiup aamma sulissutigaa periuseq pineqartoq inuussutissarsiutigalugu piniarsinnaanermut allagartamut tunngatillugu atuutilernissaa, taassumalu eqqunneqarnissaa naatsorsuutigineqarpoq oktobarip 15-iat 2020 sioqqullugu.
Naalakkersuisoqarfiup ilanngullugu Inuussutissarsiutigalugu piniartunut sunngiffimmilu pinialuttartunut eqqaasitsissutigissavaa oktober-december 2019-imi aamma 2020-imi septembari 2020 ilanngullugu pisarineqarsimasut kingusinnerpaamik oktobarip 15-iani 2020 nalunaarutigineqariissammata, 2021-imut piniarsinnaanermut allagartamik pissagaanni aammalu piniakkanut killilersukkanut tunineqarnissaq eqqarsaatigalugu.
Erseqqinnerusumik paasisaqarusukkuit immikkoortortaqarfimmi pisortaq Amalie Jessen, Aalisarnermut, Piniarnermut Nunalerinermullu Naalakkersuisoqarfimmut attavigiuk, oqarasuaat: tlf.: 34 53 04, e-mail AMALIE@nanoq.gl