Sulinermi isumasioqatigiisitsineq ulluni marlunni Aasiaat Katersortarfianni ingerlanneqassaaq, tamannalu pissaaq 29-30. september 2020. Kommunimi meeqqanut inuusuttunullu sullissisut illoqarfinnit, nunaqarfinniillu tamanit suliassaqarfik INUIT-mi sullissisut aqutsisuilu, aamma suliassaqarfik Timi Tarnilu-mi pinaveersaartitsinermik suliaqartut, inunnik isumaginnittoqarfimmilu aqutsisut ataatsimut pilersaarusioqatigiissapput.
Sulinermi isumasioqatigiisitsinerup siunertarivaa Kommune Qeqertalimmi Kommunalbestyrelsip, ukiunut tulliuttunut tallimanut, meeqqanut inuusuttunullu suleriusissamik pilersitsinissaminut siunniussimasaa timitalerlugulu piviusunngortinnissaa.
Isumasioqatigiisitsinermi meeqqanut inuusuttunullu atugassarititaasut, atuagarsornikkut angusarissaarnerulernissaq inuunerissaarnerulernissarlu ilaatigut eqqartorneqassapput.
Toqqammaveqarluartumik pilersaarusiornissaq sinaakkusiinissarlu anguniarlugu, Kommune Qeqertalimmiit pingaartinneqarpoq, meeqqanut inuusuttunullu susassaqartut siammasissumik peqataatinneqarnissaat.
Isumasioqatigiinnerup naammassinerani suliassaqarfinni assigiinngitsuni, susassaqarfiillu akimorlugit, Kommune Qeqertalimmi ataqatigiissaakkamik suleriusissanik pilersitsisoqassaaq.
Allattoqarfik, INUA.
Kommune Qeqertalik.