Marlunngorneq 15. september 2020 Tamat oqartussaaqataanerisa FN-ip ullorititaa malunnartinniarlugu Gammeqarfimmi atuartut atuartoqatigiinnut siulittaasussamik qinersineq ingerlappaat.
Qinersinnginnermi atuartut 1. klasseniit 10. klassenut nalunaaqutalersukkamik siulittaasunngorniullutik qineqqusaartunut apeqqarissaarneq uummaarissumik ingerlanneqarpoq. Qineqqusaartut ateqarput: Nora Dahl Josefsen, Aviana Rafaelsen Fleischer, Ikiuna Løvstrøm aammalu Mika Andersen Rosing – qineqqusaarnertik uummaarissumik apeqqarissaartunut akissutissaqartarlutik ingerlappaat. Apeqqarissaartitsinerit qineqqusaarnerillu pereermata qinersineq ingerlanneqarpoq. Nal. 13.00 missaani qineqqusaartuni sisamaasuni qinigaanerpaaq suaarutigineqarpoq. Ukioq atuarfiusoq 2020/2021 Gammeqarfimmi atuartoqatigiinni siulittaasunngorpoq Mika Andersen Rosing. Qineqqusaartut tamaasa angusaannik pilluaqquagut suleqatigilluaqqinnissaannillu qilanaalereerpugut.
Atuartuni qinersisinnaasuni 425-ini atuartut 336-it qinersiartorsimapput.
Atuarfiup Pisortaa:
Ajaaja Rosing
