Meeqqat 22-vit ukiut 69-it qaangiupput 1951-mi Danmarkimut aallartitaammata ilaqutaaniit avissaartillugit, siunertaralugu meeqqat Kalaallit nunaannut uterpata Kalaallit Nunaanni maligassiuisussatut, inuiaqatigiit Kalaallit inooriatsimut allanngortinnissaannut siuttuussasut. Meeqqat Danmarkimiinnerminni qallunaatut oqalunneq, qallunaallu inooriaasiat ilikkassagaat pilersaarutaasimalluni.
Meeqqat Danmarkimiinnerminni qallunaatut oqalunnermik ilinniartinneqarput, atuarfinni atuartitaallutik. Ukioq ataaseq qaangiummat meeqqat arfinilinnik aamma qulingiluanik ukioqalersimasut Kalaallit Nunaannut utertinneqarput, amerlanerpaartaat Nuummi børnehjemmemut pipput, meeqqat angerlarsimaffimmiinnerminni qallunaatuinnaq oqaloqqusaasimapput, qallunaat atuarfianni atuartitaallutik meeqqallu angerlarsimaffimmiinnerminni sapaataannakkut ilaquttaminniit pulaarneqarsinnaasarsimallutik.
Maanna ”Meeqqat misileraaffigineqarnerat” pillugu oqaluttuarisaanermut tunngasumik nassuiaasiortoqarpoq. Ministeriunerup aamma Naalakkersuisut Siulittaasuata ulloq 27. februar 2019 isumaqatigisaannik.
Meeqqat aallartitaasimasut Qallunaat naalagaaffianut utoqqatseqqusisimapput, meeraanerminni misileraatitut atorneqarsimanertik akuerisinnaanagu inuunermillu sinnera innarliutaammat.
Manna tikillugu Redbarnet Kalaallit meerartaannut aallartitaasimasunut utoqqatsersimapput. Qallunaat naalagaaffiat utoqqatsernissaminut neriorsuisimagaluarluni suli utoqqatsissuteqangilaq.
Stine tallimanik ukioqarluni inunngorfimminiit Aasianniit 1951-mi Kalaallit Nunaanniit Danmarkimut aallartitaasunut ilaavoq . Kalaallit Nunaannut uteramik Nuummi meeqqat angerlarsimaffiannut inissitaagamik 16-nik ukioqalernissani tikillugu meeqqat angerlarsimaffianni najugaqarpoq. Kingorna Københavnimut nuussimalluni suli maannamut illoqarfigalungu.
Pingasunngorneq 30. Juuli 2020 Aasiaat alianaalluni seqinnarissoq Stine Heinesen inuuimmini ilaquttanilu kaffesortitsipput.
Stine aallartitaannginnermini Aasianni tallimmiigamili aatsaat inunngorfimmini inuuissioqqippoq. Uini Mikael, qatanngutini Ole Geisler soralussani Bodil Geisler ikinngutinilu peqatingalugit.
Borgmester Ane Hansen aamma Ataqatigiissaarisoq, Inoqarfik. Inunngu Nielsen Stinep inuuiani kaffesoriarput pilluaqqusiartorlutik.
Asseq talerperlermiit: Bodil Geisler, Ole Geisler, Stine Heinesen, Mikael Heinesen.
“Nuanneqaaq inunngorfinni inuuissiorluni silalu alianaalluinnarpoq, ukiummi 70-sit matuma siorna kingullermik nalliussivara inuuiga maani inunngorfinni Aasianni. Attortisimanarpoq aamma misigissutsit oqaasertaleruminaapput, nuannaarpungali uiga, ilaquttakka ikinngutikkalu ilagalugit ulloq 75-siliillunga nalliussisinnaagatsigu illoqarfimmi inunngorfigisanni ukiorpassuit inuuissiorsinnaasimanaga.”
Borgmester Ane Hansen & Stine Heinesen.
Borgmester Ane Hansen ulloq taanna kaffisorianut ilaasoq oqarpoq; “ Stine Heinesen-ip tallimanilli ukioqalerluni inunngorfimmini inuuissioramili, 75-nik ukioqalerluni maani inuuissiorumasimammat attortinnarlunilu killitsisimanarpoq. Neriuppungalu Qallunaat nalagaaffiata piffissami qanittumi neriorsuinertik malillugu utoqqatserfigiumaaraat, maannami meeqqat 22-viusimasut ikittuinnanngorput assaat illuatugaannaanik kisinneqarsinnaalersimallutik.”
“Kiisami naapertuilluanngitsumik pineqarsimanerput, naapertuilluannginnerlu inuunitsinnut allannguisup nassuiaatitaa inissilerpoq.
Utoqqatserfigineqarnissarput Qallunaat naalagaaffianut kissaatigisimavarput. Suli utoqqatsertoqarnikuunngilaq qallunaat naalagaaffianit, neriuppunga nassuiaat naammassippat sivisuumik utaqqisimasarput piumaartoq. Tassa utoqqatserfigineqarumaartugut.
Politikkikkut taamatut aalajangiisoqarsimanera misileraataalluta naapertuilluannginneruvoq. Ukiorpassuit akissummik utaqqivugut tassa una qaammat paasisaqarnissarput inissiinissarput piliivippasippoq, tamannalu qilanaarivara kiisami pisimasoq naapertuutinngitsoq naggaserneqarsinnaalerunarpoq. Neriullunga qallunaat naalagaaffiata utoqqatserfigiumaaraatigut eqqissiniassagatta taamanimi politikkikkut aalajangiineq kukkunerujussuuvoq, ilaquttagut, oqaatsigut, nuna najugarisagut annaavagut.”- Taama naggassiivoq Stine Heinesen.
Stine Heinesen.