Aasianni illerfissarsiutileqatigiit IFT biilinik ilisiartuutinik Kommune Qeqertalik, Aasiannut tunissuteqarput.

12. august 2020

Persuarsiornartumik Aasianni kommunip ataatsimiittarfiani marlunngorneq 4. august 2020 illerfissarsiutileqatigiit siulersuisui pisortatigoortumik biilit Aasianni ilisinermi atorneqartartussat kommunimut tunniuppaat.

Illerfissarsiutileqatigiit biilinik tunisiniarlutik december 2019 kommunimut saaffiginnipput, tamatuma kingorna allaffissornermi suliat ingerlasimapput, kommunalbestyrelsillu 30. April 2020 akuerisaanik maanna ilisinermi biilit Aasianni kommunip ingerlatarilerpai.

”Qujavugut ilaasortagut sinnerlugit biilit tunniunneqartut kommunip tigulluarmagit, Aasianni ilaasortagut sinnerlugit innutaasunut tunniussaq kusanartuuvoq, ilaasortatsinnullu qujavugut.”- Taama oqaaseqarpoq Hansine Storch, Siulittaasoq. IFT Aasiaat.

Kommunalbestyrelsi biilit Aasianni ilisinermi atugassat kommunip ingerlatarilissagaat akuerineqarmat piumasaqarput kommunimi inoqarfiit tamarmik ilisisarneq pillugu misissuiffigineqassasut. Kommunimi misissuinerup siunertarissavaa inoqarfinni tamani assigiinnerusumik ilisinermi suleriuseqalernissaq. Ilisisarnerullu assigiissarnissaanut aningaasatigut kingunissai naatsorsorneqassapput.

Aasianni illerfissarsiutileqatigiit kommunip sinnerani illerfissarsiutileqatigiit suleqatiserivaat.

Aasianni peqqinnissaqarfik qitiusumik inissisimammat Aasianni illerfissarsiutileqatigiit Aasiaat kommunip sinnerani illerfissarsiuutileqatigiit suleqatigalugit ukiaq manna illerfinnik Aasianni piareersimasoqalernissaa suliniutigivaat. Illerfissarsiutileqatigiinnut ilaasortat akornanni toqukkut qimaguttoqarnerani illerfinnik tigoriaannaqalernissaa suleqatigiissutigalugu allartissimalerpaat. Taamaasilluni nujagaqarfigisaq qimallugu toqukkut qimaguttoqarnerani illerfinnik pissarsiniarneq ajornartarsimasoq oqilisaaffigineqalissalluni.