2009-mi efterskole atuutilermat ileqquuvoq atuartut naggataarnersiorneranni nersornaasiisarneq. Tallimanngorneq 12. juni 2020 efterskolemi atuartut 29-t naggataarnersiorneranni Qasigiannguani kommunip sullissiiviini pisortaq Søren H. Lange aamma kommunalbestyrelsimut ilaasortaq Aqqa Samuelsen nersornaatisisunut tunissuteqarput.
Qasigiannguani Efterskole Villads Villadsenimi ukioq atuarfiusoq 2019/2020 naggataarnersiornermi nersornaasiineq.
16. juni 2020
Ukiumi Efterskolertutsialattut toqqarneqarpoq Tina Larsen, Maniitsormiu.
Tina Larsen ukioq naallugu ineqatigiit torersumik najugallit ilaat, ikiuukkumatooq, piffissamik ataqqinnittoq atuarfiullu malitassaanik pisussaaffittut isigalugit malinnittuuvoq.
Piumassutsiminik igaffimmi sap.ak. naanerini aamma ikiuuttartoq.
Peqqissumik inuuneq ingerlatarigamiuk ussernartunut kalluaruminaatsuuvoq, nipaatsoq eqqissisimasoq atuarnerup avataatigut timersuummik soqutigisamik sammisaqartoq. Tinap ersersittarpaa nammineq aalajangersinnaassutsini taamaalilluni inuusuttoqatiminut maligassiuilluartuuvoq.
Aqqa Samuelsen, kommunalbestyrelsimut ilaasortaq (IA). Nersornaasigaasoq Tina Larsen. Qasigiannguani kommunip sullissiivini Pisortaq, Søren H. Lange.
Henrik W. Inûsugtoq, Ineriartortitsinermik takutitsilluartutut nersornaasigaavoq
Paninnguaq Kristiansen, Kajumissaatitut nersornaatisivoq.
”Ulloq nuannerluinnartumik ingerlavoq, ukioq atuarfiusoq naggaserlugu sulisut, efterskolip siulersuisui, atuartut angajoqqaarsiaasartullu nerersuaaqatigiillutik grillereqatigiipput.
Pinngitsoorneqarsinnaanngilaq avissaarnialernermi imminut ungagineq, atuartut imminnut ilisimasariilerlutillu avissaartarnerat tamatigut attortisimanartarpoq, imminut sungiulluarlutillu avissaartaramik. Ulloq nuannersoq naggaserlugu seqinersuaq nuissanit nuillarmat ulloq nuannernerusinnaanngilaq” – Taama oqaaseqarpoq Efterskolip Villads Villadsenip forstanderia Rakel Sandgreen.
Efterskole Villads Villadsen pillugu:
Ukioq atuarfiusoq: 2019/2020 Atuartut aallartikkamik 74. Naammassisut: 29. Atuartut atuarunnaarnerinut pissutaasut arlaqarput: Killissamik qaangiinermi atuarunnaarsitsinerit, atuartut nammineerlutik uniinnarnerat aamma Covid-19 peqqutigalugu angerlarnerit.
Efterskole Villads Villadsen (EVV) 2009 Qasigiannguani atulerpoq Kalaallit Nunaanni ukiuni kingullerni ataavartumik Efterskolit siullersaattut. Efterskolip siunertaraa meeqqat atuarfiata ilinniarfinnullu qaffasinnerusunut akunnermiliuttuunissaq.Efterskole ilinniartunut 16-it 18-illu akornanni ukiulinnut 80-nut inissaqarpoq, meeqqallu atuarfianni naammassisimasut pingaarnertut ilinniartorisarlugit.
Efterskolip neqeroorutigai toqqarneqarsinnaasut pingasut: Asimiinneq/Misigisassarsiornerlu, Ilusilersuineq/Eqqumiitsuliornerlu kiisalu Attaveqatigiinneq/Qarasaasialerinerlu. Taakkulu saniatigut nalinginnaasumik atuarfimmi ilinniartitsissutigineqartartut.Efterskole Villads Villadsen inissisimavoq Qasigiannguani alianaalluinnartumi, illoqarfillumi ukiumut ataatsimut pissanganartumut nunarpullu tamakkerlugu nutaanik ikinngutitaarfiusumut sunniuteqaqataavoq.
Efterskole Villads Villadsenimi atuarneq periarfissatsialaavoq atuartitaanermut pissanganartumut nutaanillu eqqarsarfiusumut ataatsimoorluni toqqissisimasumik misigisaqarnissamut.