Kommune Qeqertalik aamma MIO ullumi 28. maj isumaqatigiissutaat:
MIO-p nalunaarusiaa nutaaq Kommune Qeqertalimmut saqqummiunneqarpoq
MIO-p Kommune Qeqertalimmi angalanerani kingullermi tamakkiisumik inernerit Meeqqat Illersuisuata Aviâja Egede Lyngep Aasianni kommunalbestyrelsemut saqqummiuppai. Kommune Qeqertalimmi meeqqat qujanartumik amerlasuut pilluarlutik imartuumillu inuuneqarput. Nalunaarusialli aamma takutippaa Naalagaaffiit Peqatigiit Meeqqap Pisinnaatitaaffiisa malinnissaanik kommuuni taanna aamma ajornartorsiuteqartoq.
Naalagaaffiit Peqatigiit Meeqqat pillugit Isumaqatigiissutaata malinnissaa anguniarlugu ataatsimeersuaqatigiinnissamik borgmester Ane Hansen aamma Kommune Qeqertalik MIO-p suleqatigiinnissamik isumaqatigiissuteqarfigaa.
Nalunaarut Meeqqat Illersuisuata Aviâja Egede Lyngep Kommune Qeqertalimmi oktober-november 2019-imi angalanerata inernerivaa. Aviâja Egede Lyngep nalunaarummi tikkuarpaa inersimasut akornanni ajornartorsiutinik oqaluuseriumanninnginneq aamma sullitamut qanippallaartarnerit (inhabilitet) meeqqat illersorneqarnissaannut annertuumik aporfiusartut. Ajornartorsiutinik oqaluuseriumanngittarnerit taakku unitsittariaqartut kiisalu oqartussat inatsisitigut pisussaaffitsik naapertorlugu ornigulluni nakkutilliisarnini nukittorsarneqassassagai inassutigai. Taamatuttaaq meeqqat inuusuttuaqqallu isumaasa ullumikkornit annertunerusumik ilanngunneqartalernissaat atorneqartalernissaallu inassutigai.
MIO-p angalaneranit nalunaarusiap saqqummiunneqarnerata kingorna MIO aamma Kommune Qeqertalik suleqatigiinnissamik isumaqatigiissuteqarput.
"Borgmesterip Ane Hansenip aamma kommunalbestyrelsip suleqatiginnikkusussutsimik piumassuseqarlutik takutitsinerat assut isumalluarfigaara. Kommune Qeqertalimmi meeqqat tamarmik inuunerminni pitsaasumik tunngavissinneqarnissaasa qulakkeerneqarnissaat uagutsinnut neriulersitsivoq," Meeqqat Illersuisuat Aviâja Egede Lynge oqarpoq.
"MIO aamma Meeqqat Illersuisuat Aviâja Egede Lynge suleqatigiinnissamik periarfissiinerat Kommune Qeqertaliup qujaffigerusuppaa. Kommuunip 1.januar 2018-imi pilersinneqarnerani unamminartut arlallit tigusimasai MIO-p nalunaarusiaata tikkuarpai, tamatuma kingornatigut assigiinngitsutigut pitsanngorsaanerit ingerlanneqarsimapput. Suliaq tamanna MIO-p oktober 2019-imi tikeraarnerata kingornatigut nanginneqarsimavoq ukiunilu tulliuttuni ingerlateqqinneqassalluni. Atuarfeqarnermut aaqqissuussinermut anguniagassat kingullertigullu meeqqanut politikki pitsanngorsaanerit ingerlatiinnarneqarnissaanut sinaakkusiisut kommunalbestyrelsip akuersissutigisimavai. Ukiup ingerlanerani ukiunut tulliuttunut tallimanut pilersaarut Kommune Qeqertalimmi meeqqanut inuusuttuaqqanullu ineriartortitsinissamut imalik saqqummiunneqassaaq, tassanilu MIO suleqatigineqassaaq," borgmester Ane Hansen oqarpoq. Nalunaarut Kommune Qeqertalimmut 28. maj 2020-imi saqqummiunneqarpoq.
Meeqqat Illersuisuata Uummannaq nunaqarfiilu, Upernavik nunaqarfiilu, Tasiilaq, Kommune Kujalleq, Qeqqata Kommunia aamma Qaanaaq siornatigut tikeraareersimavai. Kommune Qeqertalimmut angalaneq Meeqqat Illersuisuata angalanerisa arfinileraat.
Angalanermit nalunaarusiat uunga aaneqarsinnaapput:
https://mio.gl/paasissutissanik-ilisimasaqarfik/mio-p-saqqummersitai/angalanermit-nalunaarusiat/
https://mio.gl/videnscenter/mios-publikationer/rejserapporter/?lang=da
Asannittumik inuulluaqqusillunga
Aviâja Egede Lynge Ane Hansen
Meeqqat Illersuisuat Borgmesteri
