COVID-19 (coronavirus) pillugu pisut Kommune Qeqertaliimmit malinnaaffigineqaqqissaarput. Tamanna pissutigalugu ataasinngorneq 9. marts 2020 kommuni aalajangerpoq upalungaarsimanissamut suleqatigiissitamik pilersitsissallutik, tassungalu ilaapput borgmesteri, pisortaaneq, illoqarfinni pisortat upalungaarsimanerlu pisortaq.
Upalungaarsimanissamut suleqatigiissitap kommunimi sulisunut makku aalajangerpaat:
- Kalaallit Nunaata avataanut sulinermut atatillugu imaluunniit atuartut angalasarnerat unitsikkallarneqarput.
- Kalaallit Nunaata sineriaata sinneranut pisariaqavinngitsumik sulinermut atatillugu angalanerit unitsikkallarneqarput (suut pisariaqavissutut nalilerneqarsinnaanersut upalungaarsimanissamut suleqatigiissitamit nalilersorneqartarumaarput)
- Sulisut sulinerminnut atatillugu aaqqissuussanut/sammisassaqartitsinernut annerusunut inunnik 100 sinnerlugit peqataaffiusunut (ataatsimeersuarnernut, pikkorissarnernut, ataatsimiinnernut il.il. peqataassanngitsut.
- Timi Tarnilumi aaqqissuussinerit anginerit upalungaarsimanermut suleqatigiit akuersaarnissaat tikillugu unitsikkallarneqarput.
Aalajangerneq ima paasineqassaaq kommuni tassaammat kommunimi innuttaasunut sunniuteqaqisutut, taamaattumik
kommuni pisussaaffeqarpoq utoqqaat illuinut, ullukkut ornittakkanut, atuarfinnut sunngiffinni ornittakkanut, qatserisartunut annaassiniartunullu suliffeqarfinnut assigisaanut tutsuiginartumik toqqissisimanartumillu ingerlatsinissaminut.
Kommunimit aamma kaammattuutigineqarpoq utoqqarnut sanngiinnerpaanullu sissuertumik pissusilersortoqarnissaq. Taamaattumik nuakkaanni imaluunniit napparsimagaanni kommunimi ulloq unnuarlu ornittakkanut, soorlu utoqqaat illuinut, najugaqarfinnut, atuartut najugaqarfiinut assigisaanulluunniit pulaartoqannginnissaa kommunimiit inassutigineqarpoq.
Angalasimaguit pasitsaassaqarlutillu puakkut maluginiagaqarlutit soorlu quersornikkut, anertikkarnikkut kissarneqarnikkulluunniit napparsimavimmut attaveqarnissat kaammattuutigineqarpoq. Napparsimaviit attavissat: https://nun.gl/?sc_lang=kl-GL
Angajoqqaat ullukkut meeqqat ornittakkani atuarfinniluunniit meeraateqartut angerlarsimanissaminnullu pisussaaffilerneqarsimasut, meeqqat angalasimanngitsut peqqinnissaqarfimmut oqarasuaatikkut attaveqaqquneqarput meeqqatit aamma angerlarsimaannarnissamik pisussaaffilerneqassanersut imaluunniit ullukkut ornittakkamut atuarfimmulluunniit ornigussinnaanersut.
Upalungaarsimanissamut suleqatigiit tusagassiorfinnut kommunillu nittartagaanut facebookianullu ingerlaavartumik paasissutissiisarumaarpoq. Tamassuma saniatigut Kommune Qeqertalimmit kaammattuutigineqarpoq Nappaatit tuniluuttut pillugit ataatsimiititaliap innersuussutai malinneqassasut, tuniluunnissaanik unitsitsiniarluni periutsit makku maleqqullugit:
1. Assatit akuttunngitsukkut errortakkit aamma assanut bakteeriaajaat (håndsprit) atortaruk.
2. Tangajoruit quersoruilluunniit talinnik asseruk - assannik assernagu.
3. Assamminnerit, ulussakkut kuninnerit pakkunnerillu pinaveersaakkit - timikkut allap attornissaa killeqartiguk.
4. Eqqiluisaarneq eqqumaffigiuk - angerlarsimaffimmi aammali suliffinni.
5. Utoqqaaguit pitsanngoriartunngitsumilluunniit napparsimaguit - allanut ungasinniarit allalluunniit qajassuusseqqukkit.
Inussiarnersumik inuulluaqqusillunga | Med venlig hilsen
Thomas Holm Jensen
Pisortaanerugallartoq