Kommune Qeqertallip nuannaarutigalugu nalunaarutigissavaa, Kangaatsiami atuarfissaq tamanut ammasumik suliariumannittussarsiuutereerlugu, atuarfiliornissaq aallartissinnaanngortoq.
Kangaatsiami atuarfissaq sanaartorlugu aallarteriaannanngorpoq
21. februar 2020
”Ukiorpassuarni innuttaasut nutaamik atuarfittaarnissamik kissaataat piviusunngulerpoq, qularnanngilarlu atuarfittaarneq, angusat qaffariarnissaannut sulinermi pingaaruteqassasoq”
Kommune Qeqertalimmi borgmesteri, Ane Hansen, oqarpoq.
”Nuannaarutigeqaarput kiisami anguniagaq anguneqaraluttuarmat. Meeqqat, ilinniartitsisut angajoqqaallumi qutsateqaagut, nutaarsuarmik atuarfeqalissammata. Sanaartorneq qularnanngitsumik Kangaatsiami suliffissaqartitsinikkut annertuumik iluaqutaassammat aamma nuannaarutigeqaarput”
- taama oqarpoq ataatsimiititaliami Inoqarfimmi siulittaasoq, Hans Aronsen, IA.
Atuarfiliornissamut suliariumannittussarsiornermi, KJ Greenland A/S sanaartortussatut suliarinnittussanngorpoq.
“Atuarfittaassaq kommunep tamakkiisumik aningaasalerpaa, tassaallunilu kommunep sanaartortitaasa annersaat. Kangaatsiami atuarfittaalernerput nuannaarutigeqaarput, qularnanngilarlu meeqqat atuarfianni angusat qaffariarnissaanut, saniatigullu illoqarfimmut pitsaasumik sunniuteqassaaq”
- Kommune Qeqertalimmi borgmesteri, Ane Hansen, oqarpoq.
Atuarfissaq nutaaliaasoq meeqqat atuarfianni inatsimmi piumasaqaatit naapertorlugit titartarneqarsimavoq, atuisussanut avatangiisit qitiutillugit.
Suliassap maajimi, 2020, aallartinneqarnissaa naatsorsuutigineqarpoq, juunimilu 2022, naammassineqareerluni tunniunneqarnissaa naatsorsuutigineqarluni.
Hans Aronsen, siulittaasoq: Ataatsimiititaliaq Inoqarfik & Ane Hansen, Borgmesteri