Kommune Qeqertalimmi borgmesteri, issittumi borgmesterit naapeqatigiinneranni peqataavoq.

Issittumi borgmesterit ataatsimoorfiata, Arctic Mayors Forumip, ataatsimiinnera siulleq Kalaallit nunaata peqataaffigisaanik Tromsømi ingerlanneqarpoq. Ataatsimiinnermi aalajangiunneqarpoq Issittumi siunnersuisoqatigiinni, Arctic Councilimi, alaatsinaatsutut aallartitaqartalernissaq anguniarneqassasoq.

Arctic Mayors Forum, AMF, siorna Akureyrimi pilersinneqarpoq, tassaallunilu issittumi borgmesterit ataatsimoorfiat. Kommune Qeqertaliup borgmesteria, Ane Hansen, aamma Kommuneqarfik Sermersuumi borgmesteri, Charlotte Ludvigsen, ataatsimoorfimmik aallarneeqataapput.

AMF-ip siunertaraa, issittumi nunat nunarsuarmioqatigiinni ersarinnerulernissaat, ingammik piujuaannaartitsineq politikikkullu apeqqutit pineqartillugit. Aamma siunertaavoq, sumiiffiit assigiinngitsut namminneq anguniagaasa pingaartitaasalu, suleqatigiiffeqarnikkut ajornannginnerusumik anguneqartarsinnaanissaat siunniunneqassasoq.

Maanna AMF siullermeerluni Tromsømi ataatsimiissimalerpoq, tassanilu siunissami suleriaqqinnissaq eqqartorneqarpoq. Aamma aalajangiunneqarpoq AMF-ip Issittumi siunnersuisooqatigiinni alaatsinaatsutut aallartitaqartalernissaa anguniarneqassasoq, tamannalu allat taama atuuffillit isumassarsiorfiginerisigut anguniarlugu aallartinneqassaaq.

AMF ukiaru Savalimmiuni Thorshavnimi ataatsimeeqqissapput, tungaanullu issittumi borgmesterit amerlanerit ataatsimoorfimmut ilanngunnissaat anguniarneqassaaq.