Naalakkersuit siulittaasuat Kim Kielsen kiisalu Ineqarnermut attaveqaqatigiinnermullu Naalakkersuisoq Karl Frederik Danielsen Aasiannut Qasigiannguanullu angalanerat iluatsillugu, Kommune Qeqertalimmi borgmester Ane Hansenip ataatsimeeqatigai.
Ataatsimeeqatigiinneq paaseqatigiiffiusumik siunissamullu isigisumik ingerlanneqarpoq. Apeqqutit sanaartornermut, angallannermut kommunillu aaqqissuussaaneranut tunngasut annerusumik sammineqarlutik.
Naalakkersuisut borgmesterillu ataatsimiinneranni apeqqutit sanaartugassanut annertuunut tunngasut, soorlu kommunip iluani erngup nukinga atorlugu nukissiorfimmik kiisalu sumiiffinni assigiinngitsuni mittarfinnik sanaartornissaq minnerunngitsumillu ininik aserfallassimasunik isatereriarluni nutaanik sanaartornissaq qaqinneqarput.
Ilanngullugu aamma tikinneqarpoq Kommune Qeqertalimmi nunaqarfiup Kangerluup angallannermut isumaqatigiissummut ilaajunnaarsimaneranut apeqqut, kiisalu nunaqarfiup ullumikkut inissisimaneranut tunngasut.
