Kommune Qeqertalimmi borgmesteri Ane Hansen ima oqarpoq:
” Missingersuutit ima suliarineqarput: illoqarfinni nunaqarfinnilu ataasiakkaat namminneq missingersuutini ilaatikkusutatik qullersaqarfik suleqatigalugu suliarivaat. Suleriuseq una aqqutigalugu sulisut tamarmik peqataatinneqarnissaat kissaatigisimavarput, aamma tassuunaqqulluta suliaqarfinnut ataasiakkaanut aalajangiisinnaatitaaneq sinaakkusiussat tungavigalugit nuukkusupparput, tamatumani aamma kommunalbestyrelsip kissaataa aalajangigaalu malinniarpavut”.
Kommune Qeqertalimmi akileraarut 2020-mi allanngussanngilaq. Kommuni 616 mio. koruuninik isertitaqartussatut aamma 7,3 mio. koruuninik sinneqartoortussatut missingersuusiorpoq.
Ukioq manna sanaartugassat 70 mio. koruuninik nalillit sanaartorneqassasut pilersaarutaavoq. Taassuma saniatigut Kommune Qeqertalik illuutileqatigiiffimmik pilersitseqqammivoq, taassuma sanaartornermut aningaasaliissutit aamma pilersaarusiortartussaavai. Tamatuma kommunimi inuussutissarsiutit ineriartoqqinnissaat tapersersorniartussaaavaa.
Inuussutissarsiorneq takornariaqarnerlu ineriartornermi sukaasussaapput.
Kommuni Qeqertaliup aningaasaateqarfiup pilersinneqarnissaanik aallartitsivoq, taassuma suliffeqarfiit Qeqertalik “Business Council” aamma “Destination Disko Bay” ingerlattussaassavai. Aningaasaateqarfiup Kommune Qeqertalimmi inuussutissarsiutit takornariaqarnerlu siuarsassallugit siunertaqarpoq.
Aalisarnerup arlalitsigut unammillernartoqaleruttornerani kommunip aningaasaateqarfik aamma sullissinermut kiffartuussinerit aqqutigalugit inuussutissarsiortunik aamma suliffeqarfinnik nutaanik pilersitsiortorneq inerisaanerlu tapersersuinissaa immikkut ittumik pingaaruteqarluinnarpoq, taamaalilluni kommunip siunissami aningaasaqarnera qajannaallisarneqassaaq.
Kommunip 1. januar 2018-imi pilersinneqarneranit 2020-mut missingersuutit tassaapput kommunip missingersuusiaasa pingajussaat (3.). Suli ukkatarineqarpoq kommunip innuttaasunut qanimut sullissilluarnerulernissaa, aaqqissuussaanermi anguniarneqarpoq kommunimi innuttaasup misigissagaa kommuni ataatsimoorfiusoq innuttaasut pisariaqartitaat qitiutillugit ingerlatsisoq, qangali ileqquusimasoq suleriuseq ingerlatsiviit sukarsuallit (fovaltninngillit) qimallugit.
Missingersuutit uani takukkit: Missingersuutit 2020 Kommune Qeqertalik.
