Kommune Qeqertallip kommunalbestyrelseata ukioq manna naggataasumik ataatsimiinnermini, aappaagu ukioq 2020-mi, meeqqat atuarfianni pitsanngorsaanissaq immikkut samminiarlugu aalajangiuppaa.
Marlunngorneq 26. november, 2019, ukioq manna Kommune Qeqertalimmi, kommunalbestyrelse naggataamik ataatsimiippoq. Siorna kukkunersiuisut aningaasaqarnermut nalunaarutaat saqqummiunneqarpoq, aappaagumullu aningaasanut missingersuut tamakkiisumik akuerineqarluni.
Immikkulli kommunabestyrelsep aappaagumut samminiagaa tassaavoq, meeqqat atuarfiannik pitsanngorsaanissaq.
Kangaatsiami pisariaqavissumik nutaamik atuarfiliornissaq aalajangiunneqareersoq maanna suliariumannittussarsiuunneqarpoq, taamaalillutik Kangaatsiarmiut ullumikkumut naleqquttumik, Atuarfitsialallu tunngavigalugu sanaamik atuarfittaarsinnaanngorlutik. Naatsorsuutigineqarpoq sanaartorneq aappaagu upernaakkut aallartinneqassasoq, 2022-milu atuarfittaaq atoqqaarfissiorneqarsinnaasoq.
Ilisimaneqarpoq nuna tamakkerlugu meeqqat atuarfianni atunngitsoortarnerit kisitsinngorlugit qaffasippallaartut. Aamma kommunetsinni. Tamanna aamma immikkut samminiarlugu kommunalbesytrelse aalajangerpoq, atuanngitsoortarnerup annertuup apparsarneqarnissaa iliuuseqarfigerusullugu.
Tassunga atatillugu pitsangorsaatissanut atasumik innuttaasut timikkut tarnikkullu peqqinnerunissaat siunertaralugu, Kommune Qeqertalik, Paarisa, Allorfillu suleqatigalugu suliniuteqarluni aallartereernikuuvoq ilisimatusarnermik malitseqartitamik.
Inussiarnersumik inuulluaritsi
Borgmester Ane Hansen, Kommune Qeqertalik.
