ICC tusagassiiuutinut nalunaaruteqarpoq:
Oktoberip 29-anni nunatsinni kommuninit tamanit atuartitaanermut aqutsisoqarfiit peqataaffigisaannik Nuummi ataatsimiittoqarmat, naggueqatigiit Inuit Akornanni Atuartitaaneq pillugu Siunnersuisoqatigiinnik pilersitsisoqarpoq. Ataatsimiinermik ICC Kalaallit Nunaat aaqqissuisuuvoq.
Ataatsimeeqataasut tassaapput nunatsinni kommunini qinikkat atorfilittallu aamma ilinniartitsisut kattuffiat IMAK sinnerlugu siulittaasuat Birthe Møller Therkildsen ICC-miillu sinniisut.
Ataatsimeeqatigiinnerup siunertaraa 2018-mi Naggueqatigiit Inuit Ilinniartitaanerat pillugu Nuummi Ataatsimeersuartoqarmat anguniagassatut inerniliussat nalilersornissaat piviusunngortinniarnissaannullu aqqutissiuinissaq siunnersuinissarlu. Taamanikkut ataatsimeersuarneq naggueqatigiinnit Canadamiit, Alaskamiit, Tjukotkamiit Nunatsinniillu ilinniartitaanermik ilisimasalinnit peqataaffigineqarpoq.
Naggueqatigiit Inuit kulturitta oqaluttuarisaanittalu atuartitsinermi ilinniartitsinermilu aallaaviunerunissaa, naleqartitat qitiutinnissaat, iluatsitat unammillernartullu ersarissarnissaat atuartitsinermilu utoqqarnik suleqateqartariaqarnermik oqariartuutip iluatiginissaa, ataatsimeeqatigiinnermi pingaartillugit eqqartukkat ilagivaat. Eqqartorneqartunut aammattaaq ilaapput atuartitseriaatsinik ilisimasanillu paarlaateqatatigiittarnissamik, minnerunngitsumillu ilisimasassarsiorluni siunertatigut, atortutigut periaatsitigullu paarlaateqatigiittarnissaq siunertaralugu tikeqaraaqatigiittarnissamik periarfissiornissaq.
Atuartitaanermut ilinniartitaanermullu Siunnersuisoqatigiinnik pilersitsisoqarmat IMAK-ip Siulittaasua Birthe Møller Therkildsen siulittaasunngorpoq Nuummilu Nuussuup Atuarfiani pisortaq Kattie Egede Motzfeldt tullinngorluni. Kommunit tamarmik ataatsimik ilaasortaatitaqarnissaat aalajangiunneqarpoq. Siunnersuisoqatigiit sulinerat ICC Kalaallit Nunaannit allaffeqarnikkut isumagineqassaaq.
