Qasigiannguani erngup nukiliorfissaq, ukiorpassuarni pilersaarutini tullinnguunneqartaraluarluni aningaasanik inatsimmiit peerneqartuarsimasoq, siorna Inatsisartuni ilaasortamit Aqqa Samuelsenimit oqaluuserisassatut qaqinneqaqqinnera maanna iluatsittutut ippoq. Ullumimi oktoberip aallaqqaataani, tamanna Naalakkersuisut inatsisartunut aalajangigassanngorlugu siunnersuutigaat.
Periarfissap taassuma Kommune Qeqertalimmi ersarinnerusumik pilersaarusiorsinnaalernissarput aqqutissiuuppaa, maannamiit illuliortiternerit erngup nukinganik kallerup innerup pilersitaanik kiassaasersorneqarsinnaasut pilersaarusiorsinnaaleratsigit. Tamatuma saniatigut erngup nukinga iluaqutigalugu suliffeqarfiit nutaat, nunatta avataani ineriartortinneqartunut pilerinarsarsinnaalissavagut, assersuutigalugu qarasaasiat atorlugit suliffeqarfinnut.
