Niaqornaarsummi atuarfiup aaqqissuussaani iluatsilluartumik saleersuaaqatigiinnermi 5 tons eqqakkat katersorneqarput.

World cleanup day Kalaallit Nunaanni siullerpaamik nunaqqatigiinnit aaqqissuunneqarpoq.

27. september 2019

Arfininngorneq 21. September 2019 Niaqornaarsummi atuarfiup Atuarfik Kristian Lundblad aaqqissuussaanik nunaqarfimmi saliineq ingerlanneqarpoq.

Tassa World cleanup day nunaqqatigiinnit Kalaallit Nunaanni siullerpaamik aaqqissuunneqarpoq.

Saleeqatigiinneq aallarnerlugu nalunaaqutaq marlunut ataatsimut erinarsoqatigiittoqarpoq,

Sara Petersenip taalliaa “Nunaga-aa pinnersutit” atorneqarluni. Kingornatigut saliinissamik aaqqissuussisoq Julius Jeremiassen tikilluaqqusilluni oqaaseqarpoq, oqaaseqareermallu ataatsimut assilisittoqarluni.

Inuit saliinissamut peqataasut 74-it nunaqarfiup iluani sumiiffinnut assigiinngitsunut

agguataarlutik 2 tiimit 30 minutsillu saleeqatigiipput.

Saliinissamut Kommune Qeqertalimmit

puussiarsuarnik tunisisoqarpoq kiisalu ATV-nik Kramerinillu atukkerneqarluta. Eqqakkanik assartuineq saliineq tamakkerlugu ingerlanneqarpoq, eqqakkallu tamaasa atuarfiup saanut katersorneqarlutik.

Eqqakkat atuarfiup saavanut katersorneqarput.

Atuarfiup saanut katersornerannut siunertaavoq, nunaqqatigiit nunaqarfiup iluani maanngaannaq eqqakkat qanoq annertutigisut takussagaat, taamaalillunilu maanngaannaq eqqaannginnissamik eqqarsalersitsinissaq.

2 tiimit 30 minutsillu qaangiunneranni eqqakkat katillugit 5 tons katersorneqarput.

Ataatsimut assilisereernerit kingorna atuarfimmi atuartut eqqakkanut tunngatillugu eqqumiitsuliaat saqqummersinneqarput, saleereenissamullu igasut igaavinik nereqatigiittoqarluni.

Naggasiullugu normunik makitsisoqarpoq, pinnatassaallutik Atuarfimmit, Pilersuisoq-mit Royal Greenlandimillu pinnatassatut tunissutit.

Ataasinngorneq 23. September 2019 eqqakkat atuarfiup eqqaanit eqqaavissuarmut assartorneqarput.

"Maanna saliineq qaangiussimalerpoq, sulili nunaqarfitta iluani avataanilu innuttaasut piumassutsiminnik saliisut takussaallutik. Imaappoq ulloq aaqqissuussarput iluatsilluarpoq, nunaqqatigiinnullu nunamik saligaatsuutitserusunnermik piumassuseqalersitsilluni.

Aaqqissuisutut kaammattuutigivarput nunatsinni kommunit tamarmik kiisalu Naalakkersuisut uunga suliuniummut 2020-mit ilanngutissasut, taamaalillutalu nunatsinnit, nunarsuatsinni nunat World cleanup day-imut peqataasut 157-it akisussaaqataalluta takutitsilluarlutalu peqataaffigilissagingut.
Piffissanngorpoq nunamut eqqaanerup unitsinnissaa, piffissanngorpoq ataatsimoorluta iliuuseqarnissarput, Niaqornaarsummi pisinnaappat aamma Kalaallit Nunaanni
tamarmi pisinnaavoq" - Taama oqaaseqarpoq Julius Jeremiassen, Atuarfik Kristian Lundblad/ Pisortaq. Niaqornaarsuk.