Qeqertarsuaq, Kitsissuarsuit, Aasiaat aamma Kangaatsiaq tikinneqarlutik.
Folketingimi ilaasortat Kommune Qeqertalimmut paasissassarsiorlutik tikeraarput.
20. september 2019
Ulluni makkunani folketingimi ilaasortat malittaallu nunatsinni angalapput, angalanerat Avannaata kommuneani Ilulissani aallartilluni, Nuummilu naammassissalluni.
Qeqertarsuarmiinnerminni Arktisk Station, oqaluffik Qeqertarsuullu katersugaasiviat pulaarpaat.
Kitsissuarsunni Ole Reimerip Atuarfiani atuartut kalaaliminernik sassaallertuupput.
Mattaat, inalukkat mattannik immernikut, saarulliit panertut, qilalukkap nikkui, nipisaat suaat akuukkat, mattak salat, rejellu iffiaqaqortulikkat, kalaallit kaagiat kiisalu sermimit imeq sassaalliutigineqarput.
Kommunip allaffia, illu sullivik, qaqqarlu isikkivigissoq alakkarneqarluni.
Aasianniinnerminni Polar Seafood, GUX Aasiaat, Katersortarfik kommunellu allaffia pulaarpaat. Kommunemut pulaarnerminni, kommune Qeqertalimmi aaqqissuussaaneq nutaaq pillugu saqqummiiffigineqarput.
Qeqertalimmi angalaneq Kangaatsiami naammassivoq, ilaatigut Kangaatsiarmiunut arsamik unamminermik peqqissaavimmut pulaareernermi.
Tikeraat Kangaatsiameereerunik Nuummut ingerlaqqissapput, angalanerlu tassani naammassissallugu.
" Tikeraat kommunitta aaqqissuussaanera pillugu soqutiginninnerat paasisaqarusunnerallu assut nuannerpoq"- Taama oqaaseqarpoq Borgmester Ane Hansen, Kommune Qeqertalik.
