Unnukkut Katersortarfimmi innuttaasunit peqataaffigineqarluartumik ataatsimiisitsisoqarpoq, tassanilu borgmesteri suliat assigiinngitsut killiffiinik ilisimatitsivoq, ilaatigut atuarfik, aqquserngit puttasullu eqqartorneqarlutik. Aammattaaq innuttaasut akornanni attaveqaqatigiinnermi silaannaap ilaanni nuanniitsup inituallaalertarnera eqqartorneqarluni. Innuttaasut ataatsimiisitsinermi peqataasut paasinnilluarput, innuttaaqataasutullu iliuuseqaqataanissamut peqataarusunnermik takutitsillutik.
Borgmester Ane Hansen nunaqarfinnut angalavoq.
Augustip 28.-30.-ni Qeqertalimmi Borgmesteri, kommunimi inoqarfiit ilaannut angalavoq, suliat assigiinngitsut killiffii oqaluttuaralugit, innuttaasullu oqaatigiumasaat paasisassarsiorfigalungit. Angalanermittaaq ammaanersiornerit marlussuit ingerlanneqarput.
12. september 2019
Angalaneq Kangaatsiami aallarnerneqarpoq.
Atuarfik, meeqqerivik utoqqaallu illuat pulaarneqarlutik, sulisuilu oqaloqatigineqarlutik avitseqatigineqarlutillu.
Pinnguartarfittaaq atorluarneqalereersoq
Ualikkut Kangaatsiami pinnguartarfittaaq meeqqat nuannaarutigeqisaannik atoqqaarfissiorneqarpoq. Allunaasamik qiorsisuuvoq atualerlaaq Sara Marie Sethsen, taamaalereermallu meeqqanut pinnguartarfik tunniunneqarpoq.
" Meeqqat qujamasuttut atuillualereersimasullu takusinnaallugu nuannerpoq tuppallernarlunilu, meeqqallu immikkut sammillattaarneqarnerat aamma iluarisimaarnarluni." - Taama Borgmester Ane Hansen oqaaseqarpoq.
Kangaatsiamiinnerup aqaguani angalaneq nanginneqarpoq, tamatumuuna Iginniarfik Niaqornaarsullu tikinneqarlutik. Iginniarfimmi Illu sullivik, 2016-imi atorneqalereernikuulluni atoqqaarfissiorneqarsimanngitsoq, Borgmesterip tikinnera iluatsillugu innuttaasunut tunniunneqarpoq, ataatsimuualaarnermilu innuttaasut borgmesterimik oqaloqateqarnissaminnut periarfissaqarlutik.
Ullup naannginnerani Niaqornaarsummi innuttaasunik peqataaffigineqarluartumik ataatsimiisitsisoqarpoq. Tassani nunaqarfimmi suliat sumut killinneri, innuttaasullu apuukkusutaat eqqartorneqarlutik.
Angalaneq tamanut pissarsiaqarfiusutut nalilertariaqarpoq, attaveqaqatigiilluarnerlu nuannaarutigineqarluni.
