Qeqertarsuaq juuni naalersoq tikikkiartorlugu qanilliartorlugu qaqqai qimerloorlugit kusanarluinnarput. Qeqertarsuup illoqarfia qanillilluarlugu illunik portusuunik takusassaqanngilaq. Illorpassuit qalipaatigissaarluinnartut tamani tamaani takussaapput. Aasaammat suna tamarmi qorsooqqissisimavoq illoqarfiup avatinnguani iluliarsuit portoqisut aserullattaasut takussaapput, akornanni arferit illoqarfimmut qanittuararsuanngorsimasut takussaapput. Aqqusinermi inuit naapitat qungujulasut ilassiortullu naapitassaallutik.
Qeqertarsuarmut tikinnermi maluginiagassat ilangivaat illoqarfiup iluani illoqarfiup assinga titartarneqarsimasoq takuneqarsinnaasoq.
Kommunip suliaqarneratigut illoqarfiup assinga takussutissaq pilersinneqarpoq. Illoqarfiup tikittarfiinut iliorarneqarsimasasunik. Taamatullu pjeceliortoqarsimavoq illoqarfiup assinganik takussutissalimmik illoqarfiullu soqarneranik takussutissiissumik illoqarfimmi suliffeqarfinnut agguaanneqartumik Kommune Qeqertalimmit.
Qeqertarsuarmi sanalukkaminnik tuninniaasartut kissaataat aallaavigalungit tuniniaaveeqqat qulisat qisummik sanaat kommunimit sanatinneqarsimapput.
Pingasunngorneq ullukkut Jørgen Broberg sanalukkaminik kusanarluinnartunik tuniaasoq naapippara. Jørgen ukioq 1988 sioqqullugu sanalulluni saaqquteeqqanik suliaqartarluni aallartissimavoq, maannalu assigiinngitsunik sanaartortarpoq tuniniartakkaminik.
Qeqertarsuarmut tikilluni maluginiangassat nuannersut ilangisarpaat illoqarfimmi illoqarfiullu avataani eqqagassanik cigaritsillu kimmivikuinik nunami takussaasoqarani eqqangakoqannginnera. Aqquserngit akulikitsumik cigaritsit kimmivikuinik eqqaavinnillu ilioraaffigineqarsimapput.
Qeqertarsuup illoqarfiata iluani eqqangassanik takussaasoqannginneranik tunngaviit arlariiupput:
Siullermik innuttaasut namminneerlutik eqqaminni saliinissaannut kommuni eqqaaviit puussartaannik pissaqartitsisarpoq, sullissivimmut aaneqarsinnaasunik.
Tulliatut innuttaasut arlallit nunami saliinermik nuannarisaqartorujussuupput taamaalillutik ulluinnarni saliineq ingerlatarisarlugu.
Pingajuattut aputaarutereeriaraangat kommuni innuttaasunut suliffeqarfinnullu saliisitsisarpoq.
Illoqarfiup nivinngaavianut kommuni allagarsiisarpoq angisuunik eqqangassaatillit eqqangassaatitik aqqusernup sinaanut iliorarsinnaagaat taamasilluni entreprenøreqarfimmi sulisut aqqusinermik kaajallaallutik eqqangassanik katersisarmata.
Kommune Qeqertalik, Tusagassiivik:
Daana R. Geisler
Qeqertarsuarmi paasissutissiisoq: Ane Sofie Mølgaard. Inoqarfik, Kommune Qeqertalik.
