Siullermeerluni ataatsimoortumik atuarfinni aqutsisut tassalu skoleinspektørit, aqutsisullu tullersortai viceskoleinspektørit naapeqatigiisinneqarnerat ingerlanneqarpoq. Isumasioqatigiinnerup tunngavittut siunertarivaa ilisareqatigiinnerulernissaq, suliat ataatsimoorfiusinnaasut pillugit eqqartueqatigiinnissaq qanorlu illoqarfiit nunaqarfiillu suleqatigiisinneqarsinnaanerinik eqqartueqatigiinnissaq aggerfinni piginnaasallit eqqarsaatigalugit atorluaanerusinnaanermik imaqartup aaqqissuussiffigineqarnissaa anguniarlugu.
Kommune Qeqertallip aaqqissugaanera ilanngullugu eqqartorneqarpoq paaseqatigiiffigalungu kiisalu isummersoqatigiiffigalugu sulinermilu ineriartoqqiffiusussami aallaavissat nutaat atorlugit oqaloqatigiinneq paaseqatigiiffiuvoq. Aaqqissungaaneq pillugu assigiinngitsunik killiffeqarluni ilisimasaqassuseqarneq peqataasunit malugineqarsinnaavoq, taamaattumillu attaveqatigiinnerup pitsaasumik ingerlattuarnissaa pingaaruteqartutut isumaqatigiissutigineqarluni innersuussutigineqarpoq.
Eqqartukkanut ilaavoq atuarfiit tunaartaasa ersarissaavigineqarnissaat kiisalu naligiimmik inoqarfinni naleqqussaasoqarnissaa, tassani siunertaammat Kommune Qeqertalimmi atuartunut sulisunut tamanut atuarfimmiullu siunnerfiinut piumasaqaatit assigiinnerusumik tunngaveqalernissaa anguniarlugu.
Ilinniartitsisut ilinniaqqissimasut ilisimasaat Kommune Qeqertalimmi atorluarniarneqarput.
Atuarfinni ilinniaqqinnermik akademisk diplomuddannelse, master kiisalu kandidatinik ilinniartitsisimanerup iluani atorluaanerunissaq isumaqatigiissutigineqarpoq. Ilinniaqqissimasut pikkorissarsimasulluunniit pissarsiaannik atorluaanissaq siunniunneqarmat. Taakkulu pillugit paasisanik misissukkanik atuarfinni ersialaarsitsisinnaaneq isumaqatigiissutigineqarpoq.
Tassunga atatillugu: ”Atuarfinnik inerisaasunik” taallugit atuarfikkaartumik pilersitsisinnaaneq eqqartorneqarpoq, illoqarfinni atuarfiit inerisaasussaminnik piukkussaminnik neqerooruteqassasut kiisalu nunaqarfinnut tamanut samminnittussamik suliamut inuttaliisoqassaaq.
Skype aqqutigalugu atuartitsinermi periarfissat pitsanngorsarlugit misilittarneqarnissaat siunniunneqarpoq. Ilaatigut tuluttuinnaq oqaaseqartumik ilinniartitsisoqarnera misilittaavigineqarnissaa siunniunneqarluni. Illoqarfiit tuluttoortitsisui suleqatigalugit misilittaanerup ingerlanneqarnissaa siunniunneqarpoq.
Atuarfiit aaqqissungaanerinut atatillugu immikkut aqutsinermi inuttullu atukkanut suliaqartinneqartut pisussaaffii eqqartorneqarput, qanorlu ersarinnerusumik atorneqarsinnaaneri eqqartorneqarlutik. Atuarfinni pikkorissarnissanut assigiinngitsunut pisariaqartitat ilanngullugit eqqartorneqarput, taamaaliornikkut atuarfiit pisariaqartitavii aallaavigalugit pikkorissartitsisarnerit tunngaveqarnissaa anguniarneqassammat.
Ulluinnarni ilinniartitsisut meeqqat atuarfianneersut kattuffiat IMAK suleqatigineqartarnera eqqartorneqarpoq eqqumaffissallu assigiinngitsut ilanngullugit eqqartorneqarlutik. Aqutsinermi najoqqutassatut atuagaliarineqarsimasoq (lederhåndbogi) ilanngullugu qissimingaarneqartuartarnissaa innersuussutigineqarpoq tassaniimmatami suleriaatsit inatsisinik maleruaqqusanillu tunuliaqutallit allattorsimaffii. Piffissami qaninnerusumik ungasinnerusumilu anguniagassanik eqqartuisoqarpoq.
Isumasioqatigiinnermi skypekkut naapittarnissaq aamma ilanngullugu isumaqatigiissutigineqarpoq. Nammineq eqqartorusutani eqqartorneqarpoq atuarfinni piffissami aalajangersimasumi atuartoqartarneq. Tassani inuuniarnikkut allatigullu isumaqatigiisuteqarsimasut tarnip pissusaanik aallaaveqartut aggerfiatut neqerooruteqarsinnaanerup qaninnerpaaffissaminiinniissaa aaqqeqqaarlugu atuartumik tikeraajusunik atuartoqartarnissaq isumaqatigiissutigineqarpoq.
Naggataatigut peqataasunit tamanit isumasioqatigiinneq pissarsiaqarfiusutut kiisalu ilisareqatigiinnerulernertut isumaqatigiissutigineqarluni naliliiffigineqarpoq.
Hector Lennert Sørensen,
Atuarfinni sunngiffimmi piorsarsimassutsimilu ataqatigiissaarisoq.
