Ataasinngorneq ulloq 3. Juni 2019 Aasianni Gammeqarfimmi atuartut 7 klassit immikkuullarissumik misigisaqarput, aallarniutitut misileraanissami toqqarneqarsimagamik. Atuarfiup pisortaanera Ajaaja Andersen Rosing, tullersorti Samuel Kleemann. Ipad Mentor Aajaraq Geisler Ipad Vejleder Rasmus Larsen Qarasaasialerisoq Nick Petersen. Kiisalu Kommune Qeqertalimmi Borgmester Ane Hansen. Kivitsisami siulersuni ilaasortaq, Kommune Qeqertalimmi atuarfinni sunngiffimmi piorsarsimasutsimilu ataqatigiissaarisoq Hector Lennert Sørensen aammalu Gammeqarfiup siulersuisuini siulittaasup tullia: Nanna Sandgreen Ipadinik agguaasoqarnerani persuarsiornartumik peqataapput.

Atuartut ataasiakkaarlugit ipadissaat aqqi taasarlugit aallertinneqarnerat ingerlanneqarpoq. Kommune Qeqertalimmi Borgmester Ane Hansen tunniussisuuvoq.

Kalaallit Nunaanni Meeqqat atuarfiata kivinneqarnera

KIVITSISA tassaavoq iluarsartuullugu pilersaarusiaq (Projekt) Kalaallit Nunaanni Kommunit tamarmiullutik suleqatigiiffigisaat. Avannaata Kommunia, Kommune Qeqertalik, Qeqqata Kommunia, Kommune Kujalleq kiisalu Kommuneqarfik Sermersooq. Ataatsimoornikkut Meeqqat Atuarfiata kivinneqarnissaa siunertaralugu suliniutaasoq. Suliniut Atuartitaanermi aqutsisoqarfik kiisalu Ilinniaatsinut institutti peqatigalugit piareersarneqarlunilu ilusilersorneqarpoq. Inerisaaneq assigiinngitsunik sukkassuseqarlunilu atuuttuulersitsiffiunissaa pilersaarusiorneqarsimavoq. Tassani kommunit tamarmik inuttatigut sulisutigut atuartutigullu minnerunngitsumillu attaveqaatitigut assigiinngitsunik killiffeqarnerat aallaaviulluni sukkassuseqassaaq. Taamaakkaluartoq Kommunit tamarmiullutik tapersersoqatigiinnerat annertuumik ingerlanneqarpoq. Siunniussap pilersinniarnerani unammilligassat assigiinngitsut takkussinnaasullu eqqarsaatigalugit tapertariinnissaq annertuumik siunniunneqarsimammat ingerlanneqarlunilu.

Pilersaarusiap imarisaa annertunerusumik Ipad Projektitut ilisimaneqarnerusoq malugineqartarpoq, taamaakkaluartoq tassunga annertuumik ilaapput: Ilinniartitsisunik piginnaanngorsaanerit, atuilernissaq siunertaralugu. Atuarfinni Ikiortit perorsaanermi ilinniartitsinermilu immikkut suliaqartinneqartut, atuartitsinissamullu siunnersuisinnaasut kiisalu suleriaatsit teknikkimut tunnganerusunik suliaqartut minnerunngitsumillu qarasaasialerisut aamma ilanngullugit suleqatigiissutigineqarput.

Ipad ilinniartitsinermi atorneqassaaq.

Atuartut ilikkarniarnermut atatillugu nipit, assit, filmit aalasut allatat kiisalu Internetsikkut aasat atorlugit katiterisinnaanermut ingerlaannarlu katersorsimasanik ilikkarsimasanik avitseqateqarsinnaanerat periarfissaqarlualissaaq. Kiisalu nunarsuup sinneranut attaveqariaatsinut periarfissamut annertuumut attaveqarsinnaalissallutik.

Taamaalisoqarnerani ilinniartitsisut aamma allatut eqqarsarlutik atuartitsisinnaanertik alloriarfigissavaat. Kiisalu misilitsinnernut tunngassuteqartut teknikki atorlugu pilertortumik periarfissaalissalluni.

Ukioq manna aallarnerfigalungu aappaagu ilanngullugu Kommune Qeqertalimmi atuartut pilersaarusiukkamik naafferartumik Ipad-inik tuniorarneqassapput.

Ipaditaarnerup aningaasalersorneqarnera kommunit tamarmiullutik  150. mio kr akilerpaat

fondit 50 mio. Kr tapiissuteqartut tassapput:

Villum Fonden

Hempel Fonden

Mærsk

OAK Foundation