“Kivitseqatigisigut” taama ilaatigut aammaqulequttamik sammisaqarlutik Kommune Qeqertalik-mi Kommunalbestyrelsit Nunaqarfimmilu aqutsisunut ilaasortat aningaasanik missigersuutinik suliaqarlutik Qasigiannguani isumasioqatigiipput.
“Meerartagut paarilluarnerusariaqarpagut isumannaatsumillu inuuneqarnissaat tamatta pisussaaffittut isigalugu suleqataaffigisariaqarparput, meeqqanik sumiginnaaneq kinguaassiutitigullu atornerluneq akuerinngilarput unitsivissornissaalu tamatta suleqatigiissutigisariaqarparput.”- Taama kajumissaaripput Kommune Qeqertalik-mi Kommunalbestyrelsimut Nunaqarfimmilu aqutsisunut ilaasortat Qasigiannguani siunissami aningaasatigut missingersuusiorneq pillugu isumasioqatigiinnerminni.
Isuumasioqatigiinneq Ulluni 24 aamma 25 Juuni 2019 Qasigiannguani ingerlanneqarpoq.
Kommune Qeqertalimmi siunissaq ungasissoq isigalugu ataqatigiissumik ineriartortinneqassasoq siunniussat ilagaat.
“Illoqarfiit nunaqarfiillu inuutissarsiornikkut periarfissaat isigalugit ineriartortitsissaagut, ulluinnarni ingerlatsinermi atugarissaarnermut tunngasuni naligiinngissutsit nalimmassarlugit ingerlatsissaagut, minnerungitsumillu nutaamik pisariitsumillu ingerlatseriaaseqalernerput inerisassavarput nunatta sinnerani isumassarfiorfigineqarluni iluaqutissarsiorfigineqarsinnaanissaa ammaffigalungu”. Taama oqarpoq Borgmester Ane Hansen
Inuussutissarsiutinik ineriartortitsinermi Kommune Qeqertalimmi nukiit tamarmik pisariaqartinneqarput. Isumasioqatigiinnermi meeqqat atugaanniit utoqqaat atugaat ilanngullugit misissuiffigineqaqqammersut isummersorfigineqarput.
Meeqqat atuarfiini misissuisarnerit takutippaat siusippallaamik meeqqat aanngajaarniutinik atuilersartut. Kommunal Bestyrelsi Nunaqarfinnilu Aqutsisut peqatigiillutik innuttaasunut saaffiginnipput meeqqat imigassamik, tupamik ikiaroornartumillu atuinerannik apparsaaneq aqqutigalugu angusanik qaffassaaneq ineriartortinneqassasoq.
“Ukiuni makkunani nunatsinni meeqqanik kinguaassiutitigut atornerluineq aamma Kommunitsinni ajornartorsiutitut atugaavoq. Kommunalbestyrelsi Nunaqarfinnilu Aqutsisut pisariaqartippaat innuttaasut qanimut suleqatigalugit kivitseqatigiinnissaq.
Pisariaqartippagut meeqqanik illersuisut, inissiigallartariaqarnermilu ilaqutariit inissiivigigallarneqarsinnaasut piareersimasut amerlanerussasut. Innuttaasut timikkut tarnikkullu peqqissut pilersinneqassappata meerartatsinnit aallartittariaqarpugut.”- Taama oqaaseqarpoq Borgmester Ane Hansen, Kommune Qeqertalik
