Qeqertarsuup Katersugaasivianut kufferteeraq tunniunneqartoq takuniarneqarsinnaalerpoq

Qeqertarsuup katersugaasiviani Februarimi pisoq

Katersugaasivimmut tunissuteqarnermit tusarliussassaq

Qaamammi Februarimi tikeraartoqarpugut Avannaani Naalagaasimasup Phillip Rosendahl-ip ( Piffissami 1924- 1939 tungaanut naalagaq) kinguaavinit, taakku tikeraat tunniussiartorput naalakkap atorfimmini angalatilluni nassatarisarsimasaa kufferteerannguaq imarpassualik. Taanna angalatilluni naalangaanermi nalaani, kiisalu Danmarkimut angerlareernermik kingorna aamma atorfeqarnermini Nunatsinnut tunngasuni Ministeriaqarfimmi nunatsinnut angalasarnerpassuamini atortarsimasaa.

Taanna kufferteerannguaq ernuttaminut kingornutassiarinikuusimasaa ernutaata Jens Rosendahl nuliani Lene aammalu panitsik Alberte ilagalugit Qeqertarsuliarpoq ukiuunerani sulinngiffeqarneq iluatsillugu Qeqertarsuup katersugaasivianut tunissuteqariartorlutik tassannga kufferteerannguamik.

Kufferteeraq Qeqertarsuup katersugaasiviani ataavartumik takusassianngortinneqarpoq.

Katersugaasiviup kufferteeraq imaalu nalunaarsorpai, imai assigiinngitsualuppassuit 40-nit ikinnerunngillat, ilaatigut makkuullutik: cigaanut kutsuusamit ipulik, ruujoreeraq putoorut cigaamut. Ataqqinaammut saqqarmiunut allattuivik, kuffertip imaasa allattuiffiat. Unngiarnermut atortut, kukinnut saliut, pujortaammut saliut, allakkanut ammarterut, pappiaraq guld-iusoq  atsiornermi atortagaq. Isarussanut puut, issallu, qaammartartoq, allaffiup qaanut inaalittagaq Philip Rosendahl mik allaqqasoq, qungasequt,arsaajaavik, aningaasivik allallu..

Marlunnittaaq meeqqanut aliikkusersuutigisartagarisimasaminik kuffertimini nassataqartuartarsimasoq taakkualu aamma ilaapput kuffertimi, tassalu inuusaarannguit marluk, aappaa pujortakkertagaq pujortagaa kukullugu pujorterujoortagaq, aappaa allunaasaaqqamik imusamik inuusaaqqat amuarlugit nerriviup qaavatigut ingerlatittagaq. ” aataajaarma meeqqat asasuugamigit aliikkusersussallugit nuannarisarpai” Ernutaa Jens Rosendahl oqaluttuarpoq aataajaani ilagisarsimallugu oqalugiartoraangat Danmarkimi Jakob Danielsen qalipagai pillugit sarsuasulianik isiginnaartitsingaangami ajaappiani natermut anarruttaraa assiliatq nikisittussanngoraangat.