Borgmester Ane Hansen-ip suliuniummi nersornaatisisunut pilluaqqussutaa:
Attormiut pilluaritsi. 31-10-2018
Tulluunnaqaaq Kommune Qeqertalik-mi nunaqarfitta kujallersaat Attu Nunat Avannarliit Avatangiisinut nersornaasiuttagaannik ukioq manna nersornaaserneqarmat. Angusaq angeqaaq Nunat Avannarliit akornanni unammisassat imaannaangitsut akornanni nersornaammik taamak angitigisumik pissarsineq.
Kommune Qeqertaliullu anguniakkani siunniussaanut naapertuulluinnarpoq avatagiisit miguitsut pinngortitallu tunniussinnaasaannik illersorneqarsinnaasumik atuineq eqqarsaatigalugu.
Attu-mi Pinngortitami isumalluutit pillugit siunnersuisut angusassinnik pilluaritsi maligassiuinersi malitseqassooq suliniutit Kommune Qeqertalik-mi siammarneratigut tapersersorneqarneratigullu.
Suliniut Pinngortitami isumalluutit pillugit siunnersuisut PISUNA 2009-mi pilersinniarneqalermat Aalisarnermut, Piniarnermut, Nunalerinermilu Naalakkersuisuutillunga tapersersorsimavara. Maanna Kommune Qeqertalik-mi Borgmesterisut Kommunalbestyrelsep suliniutip ingerlaannarnissaa aamma tapersersussallugu inassutigissallugu piareersimallunga.
Suliniutip Nunatta Pingortitaleriviata ilimatusarnermi piniakkat pillugit paasissutissanik katersisarnerani uppernarsakkanik piniartut aalisartullu peqataanerattut ineriartortissagaat inassutiginaqaaq. Piniakkanik pinngortitallu tunniussinnaasaanik piujuaannartitsinissaq siunertaralugu suliniut nunatta sinneranut siammassasoq Naalakkersuinikkut suliaqartunut ilanngullugu qularnaarniarneqassasoq inassutigerusunnarluni.
Attu-mi innuttaasut ukioq manna nunaqarfissi tunngavilerneqarneraniit ukiut 200-rujut qaangiunnerat nalliussineqarnera eqqorlugu nersornaammik taamak nuimatigisumik nersorniarneqarassi uummammik pisumik pilluaquassi.
Ane Hansen, Kommune Qeqertalik-mi Borgmesteri.
