MISI sunaava?
MISI tassaavoq meeqqat, angajoqqaat suliamillu ilisimasallit ataatsimoorlutik meeqqat ingerlalluarnerannik ineriartornerannillu siuarsarnissaannik tapersersuisussaq.
Kikkuuvugut?
MISI (Perorsaanermut tarnillu pissusaanut tunngasumik siunnersuisarneq) tassaavoq assigiinngitsunik sulialinnik ataatsimoorussamik siunnersuisartoqatigiit, atuarfiit, meeqqeriviit ilaqutariillu suleqatigalugit, meeqqat ingerlalluarnerat, ineriartornerat ilinniarnerallu nukittorsarniarlugit. MISI Qeqertalik meeqqat inuusuttullu 0-18-inik ukiullit pillugit siunnersuisarnermik suliaqartarpoq. MISI perorsaanikkut siunnersortinik tarnillu pissusaa pillugu immikkut ilisimasalinnik inuttaqarpoq. Kalaallisut, qallunaatut tuluttullu saaffiginnittoqarsinnaavoq.
Makku suliarisarpagut:
o Meeqqat ineriartornerannik naliliineq
o Angajoqqaanut, ilinniartitsisunut perorsaanermillu suliaqartunut siunnersuineq
o Pitsaaliuinermik aamma ilanngutsitsinermik suliniutit
Suut pillugit saaffigisinnaavisigut?
Meeqqap ingerlalluarnera, ineriartornera, ilinniarnera imaluunniit inooqataanikkut attaveqaqateqarsinnaassusia pillugit apeqqutissaqaruit MISI-mut attaveqarsinnaavutit.
Makku pillugit ikiuussinnaavugut:
o Malinnaaviginninneq aamma suliamut tunngatillugu isumasioqatigiinneq
o Perorsaanermut tarnillu pissusaanut tunngasumik naliliineq
o Siunnersuineq
o Tapersersuilluni ingerlatassat pillugit suleqatigiinneq
“Meeqqap ingerlalluarnera pillugu suleqatigiikkaangatta, ineriartornissamut periarfissat pilersittarpagut”
Qanoq suleriaaseqarpugut?
Tamanut ataqqinnilluta, paasisaqarusulluta suliamullu tunngatillugu ilisimasatigut tunngaveqarluta naapitsisarpugut. Suleqatigiinneq pingaartipparput, aammalu angajoqqaat suliamillu ilisimasallit meeqqamik ilisimasaqarnerpaanerat upperalugu.
Periaaserput:
o Tamakkiisumik isiginninneq
o Oqaloqatigiinnermik aallaaveqarneq
o Meeqqamik qitiutitsineq
MISI-mut saaffiginnittoqarsinnaavoq, meeraq assersuutigalugu makkunatigut unammilligassaqartillugu:
Ingerlalluarneq
Immaqa malugisarpat meeraq aliasuttoq, kiserliortoq, qinngasaarneqartoq imaluunniit ilaquttamik qanigisamik annaasaqarnini imaluunniit angajoqqaami avinnerat pissutigalugu aliasuttoq.
Pissusilersorneq
Immaqa malugisarpat meeraq piumasaqaatinik killissanillu ajornakusoortitsisoq, kamarujussuarluni qisuariartartoq imaluunniit pissusilersornikkut allanik unammilligassaqartoq.
Sunniivigeqatigiinneq
Immaqa malugisarpat meeraq meeqqanik allanik peqateqarnermi imaluunniit ikinngutitaarniarnermigut unammilligassaqartoq. Aamma perorsaanermut, angajoqqaat meeqqallu akornanni pissutsinut, killiliinermut il.il. tunngatillugu unammilligassanut tunngasuusinnaavoq.
Ineriartorneq
Immaqa malugisarpat meeraq ukioqatiminut sanilliullugu ineriartornermigut unammilligassaqarsinnaasoq. Meeraq assersuutigalugu oqaatsitigut, aalanikkut aamma/imaluunniit ilinniarnermi unammilligassaqarsinnaavoq.
Qaammaavik
Qaammaavimmi immikkoortortaqarfimmi ilaqutariinnik katsorsaasartut ilaqutariinnillu ilitsersuisartut sulisuupput, pingasunngornerillu tamaasa nal. 13.00 – 15.00 ammasumik kinaassutsimik nalunaaruteqarani siunnersuinissamut piareersimasarlutik.
“Qaammaavik Qeqertalimmi uagutsinnut pingaaruteqarpoq, innuttaasut uagutsinnut saaffiginnittut tamatigut toqqissisimasumik sullinneqarlutik, ataqqineqarlutik pitsaasumillu naapinneqarlutik misigisarnissaat.”
MISI aamma Qaammaavik Qeqertalik ataasinngornermiit tallimanngornermut nal. 09.00-imiit 15.00-imut ammasarput.
Piffissami tassani ornigulluni imaluunniit ataani attaveqarnissamut periarfissaq aqqutigalugu saaffiginnittoqarsinnaavoq.
Najugaq:
MISI aamma Qaammaavik
Pujooriarfiup saqqaa 2A,
3950 Aasiaat.
Oqarasuaat: 38 73 22 og 38 73 17
Mail: MISI@qeqertalik.gl og qaammaavik@qeqertalik.gl