Timmisartunik qulimiguulinnillu suliaqarnermik sinnattut piviusunngortiguk! Timmisartuni teknikerinngorit taamatullu assersuullugu F16, Airbus A380 aamma Chinook-inik suliaqartalerlutit. Ilinniarneq Nuummi aammalu Hvidovrimi ingerlassinnaavat taamatullu suliffeqarfimmik pissanganaqisumi ilaalerlutit tassuunalu nunarsuarmi timmisartunik pikkunarnerpaanik suliaqartalerlutit.
Ilinniarneq aallaavittut ukiuni 4½ sivisussuseqarpoq tassani tunngaviusumik ilinniarneq ilalluni taavalu Air Greenlandimi suliffimmik misiliinermik aammalu Hvidovrimi TEC-imi ilinniarnermik paarlakaajaannertalimmik ingerlanneqassalluni.
Ilinniarneq Nuummi ilisarititsinerusumik aallartinneqassaaq, taassumalu kingunerani Hvidovrimi TEC-mi sapaatip akunnerinik 20-nik sivisutigisumik tunngaviusumik ilinniarnertaqassalluni. Kingusinnerusukkut atuarnerit sapaatip akunneranik 10-nik sivisussusillit 6-t ingerlanneqassapput, 1 sapaatip akunneri 7-nik sivisussusilik, 1 sapaatip akunnerinik 8-nik sivisussusilik aammalu 5 sapaatip akunneri 9-nik sivisussusilik ingerlanneqassapput taakkualu tamarmik misilitsinneqartussaallutik.
Atuarfimmi ilinniagassat: Ilaanni Aerodynamikki, motorit, timmissartup saneqaataa aammalu timmisartup atortorissaarutai. Aamma uku ilinniagassat sammissavatit dansk, engelsk, fysik matematik aamma elektronikki
Suliffimmik misiliinerit Air Greenlandip hangariani, komponentværkstediani, motorværkstediani, elektronikværkstediani aammalu pladeværkstediani sulisitsisunik pitsaaqqissaartunik aqunneqartunit ingerlanneqarumaarpoq