Ilinniarneq ukiumik ataatsimik sivisussuseqarpoq, semesterimilu ataatsimi marlunnik moduleqarluni, piffissarlu eqqarsaatigalugu modulimi ilinniartitaaneq sioqqullugu kingornalu atuarnissamut, suliakkiissutinik suliaqarnissamut sulinerlu pillugu isummersornissamut piffissaqarnissamut periarfissaqartitsisoqarluni. Moduli ataaseq nalinginnaasumik sapaatit akunnernik marlunnik sivisussuseqarpoq, ullut angalaffiusut ilanngullugit.
Modulit Kalaallit Nunaanni ilinniartitsinissamut atortussaqarfiusuni angalasunullu unnuiffissaqarfiusuni ingerlanneqartarput. Ilinniarneq aallaavittut Ilinniartut akuerisaasimasut kommunerisaat tunngavigalugu ikannerussuteqartut kommunerisaanni ingerlanneqartarpoq. Qinnuteqartut piukkunnaatillit minnerpaamik 18-it akuerisaanerani holdi pilersinneqartarpoq – minnerpaamik 8-nik ilinniartoqartillugu suliassaqarfimmut immikkut piginnaanngorsaasoqartarpoq.
Siunnersuinermi Ikiortitut Ilinniakkamut akuerisaanissamut piumasaqaataavoq qinnuteqartoq
- 10. klassimi allattariarsornermi inaarutaasumik misilitsissimanissaq minnerpaamik kalaallit oqaasiini 4 minnerpaamillu danskit oqaasiini 02 karakteereralugit, imaluunniit
- sunngiffimmi atuartitaanermi misilitsissimanissaa minnerpaamik kalaallit oqaasiini 4 minnerpaamillu danskit oqaasiini 02 karakteereralugit.
Aammattaaq piumasaqaataavoq qinnuteqartup
- siunnersuinerup iluani minnerpaamik ukiumik ataatsimik sivisussusilimmik uppernarsaatitalimmillu sulisimanissaa, aamma
- meeqqat inuusuttullu, imaluunniit innarluutillit inersimasunilluunniit utoqqarnillu aarlerinartorsiortunut suliassaqarfimmi oqartussaasutut sulianik suliaqartutut uppernarsaatitalimmik aalajangersimasumik atorfeqarnera
- suliffini peqatigalugu ilinniarnissaminut pilersaarusiorsimanissaa inersimasunut tunngasunut suliassaqarfimmut imaluunniit meeqqanut inuusuttunullu tunngasunut suliassaqarfimmut immikkut piginnaanngorsarnissamut kissaateqarnermik imaqartunik
Ilinniagarisimasanut kiisalu sulinermi misilittakkanut uppernarsaatit attuumassuteqartut ilinniarnissamut kissaateqarnerup allanneratigut piumassuseqarluni qinnuteqaammut ilaliunneqassapput.
Ilinniakkamik imaluunniit ilinniagaqarnersiutinik qinnuteqassaguit imminut sullinnermut toorsiffissaq sungaartukkut qarasaasiakkut/internettikkut tassani quppernermi qulaani saamiatungaaniittukkut ”Maana qinnuteqarit”-kut qinnuteqassaatit. Imminut sullinnermi periarfissat atussagukkit nammineq inuttut MitID-nnut isissaatit.
Uku atussavatit
- MitID
- Pappilissat ilinniagarisimasamut tunngasut (meeqqat atuarfianni karakteerinut uppernarsaatit atuutinngillat 2007-ip kingorna meeqqat atuarfiannit atuarunnaarsimaguit)
- Suli meeqqat atuarfianniikkuit karakteerit kingulliit allattorsimaffiat atussavat.
Uku atussanngilatit
- Kuisinnermut allagartaq
- Najugaqarnermut uppernarsaat
- Nunatsinni meeqqat atuarfiannit karakteerinut/angusanut uppernarsaatit (2006-ip missaanit ulloq manna tikillugu karakteerit pisortat paasissutissaasivianniipput).
Malugiuk
Karakteerit marlussuit amigaatigigukkit imaluunniit meeqqat atuarfianni inaarutaasumik misilitsinnerni angusisimanngikkuit Majoriat tamarmik piginnaanngorsaanissamik neqerooruteqartarput.
Najukkanni Majoriamit qinnuteqarnissannut ikiorneqarsinnaavutit, aamma allatut siunnersorneqarnissannut ikiuisinnaapput.
Ilinniartunut inissiamik pinngitsoornak neqeroorfigineqarnissat naatsorsuutigisinnaannginnakku maluginiassavat. Ingerlaannartumik ilinniartunut inissiamik tunineqanngikkuit Majoriami immikkut qinnuteqartariaqassaatit.
Immikkut ittumik pisoqartillugu pappialatigut qinnuteqarfissamik najukkanni Majoriamit tunineqarsinnaavutit. Qarasaasiakkut/internettikkut qinnuteqarsinnaanngikkuit najukkanni Majoriaq attavigiuk.
Ilinniarfiup qinnuteqarfigineqartup illit qinnutitit suliarisussaavai, ingerlaavartumik akissuteqarfigineqartassaatit. Ilinnialernissap aallartinnissaanut sapaatit akunnerit pingasut inulerpagit sulilu tusagaqarsimanak, ilinniarfimmut attaveqartariaqassaatit.
Ilinniarnermik aallartiffik
Ilinniagaq ingerlaavartumik aallartittarpoq
Neqeroortoq
Perorsaanermik Ilinniarfik (PI/SPS)
Aningaasaqarneq
Sulisitsisunniit akissarsiaqassaatit, tamanna pissutigalugu ilinniarnersiutinik imaluunniit ilinniartut akissarsiaanik pisinnaanngilatit.
Suliffimmik misiliinermi pissutsit
Suliffimmik misiliiffissamik aallartitsinnak nassaarsimassaatit.
Piginnaasat qaffasissusaat
Ilinniagaq inuunerup ingerlarngani ilinniarnermi piginnaasat qaffasiffiisa sinaakkutai 3 inissisimapput. Piginnaasat qaffasiffiisa sinaakkutai 1-mit 8-mut qaffasissuseqarput atuartitsinermullu pissarsiassatut naatsorsuutigineqartut nassuiarpaa. Atuaqqinnerugit. Ingerlaqqiffiusumik inersimasunik ilinniartitaanermi piginaasat qaffasissusaat
Siunissami periarfissat/ Suliffiusinnaasut
ilinniarnermik naammassereeruit ukunani atorfininniarsinnaavutit ulluunerani paaqqinnittarfiit aamma ulloq unnuarlu paaqqinniarfiit.Ilinniakkavit ilinniaqqinissannut ilinniagassanut qaffasinnerusunut periarfissiissaaq.
Ilinniarnermik aaqqissuussineq
Uani atuagaaraq aasinnaavat: https://pi.sps.gl/ka/ilinniakkat/siunnersuinermi-ikiortitut-ilinniagaq/
Suliap suliarineqarnera imaluunniit alla pillugu naammagittaalliorusukkuit ilinniarfik attavigissavat.