Nuannaarutigalugu nalunaarutigissavarput, ingerlatsivik INOQARFIK-up ataani pilersaarusiornermut nunaminertanullu pisortartaarmat.
Hanne holm Andersen 1.oktober 2026 atorfinippoq. Hanne arkitektitut maa-tut ilinniagaqarpoq, kommunillu ataani INOQARFIK-mi ataqatigiissaarisutut atorfeqareernermini ilisarisimaneqareerluni.
Hanne Kalaallit Nunaanni illoqarfiup pilersaarusiorneranik, pilersaarusiornermi pisortatut, ataqatigiissaarisutullu ukiuni 27-ni misilittagaqarpoq.
Atorfimmini nutaami, kommunep illoqarfiinut nunaqarfiinullu tamanut atuuttussami, akissaaffigissavai piffiit pilersaarusiorneqarnissai, immikkoortunut pilersaarutit, ineriartortitsinermi suliniutit kiisalu kommunep nunaminertaata atorneqarnerata aqunneqarnissaa. Tamatuma saniatigut pilersaarusiornerit ingerlanerini, oqartussaasutut suliassanut sulianullu assigiinngitsunik susassalinnut ataatsimut aqutsisuunissaq suliassarissavaa. Politikkikkut anguniakkat piumasaqaatillu sumiiffinniittut pilersaarutinut piujuartussanut aalajangiiffigisassanullu erseqqissunut tulluussartussaavai, kiisalu nunaminertanik aqutsineq, inatsisilerineq, tusarniaanerit kiisalu innuttaasunik, suliffeqarfinnik oqartussaasunillu suleqateqarneq isumagissallugu.