Nuannaarutigalugu ilisaritissavarput sanaartornermut illuutinullu fagchef nutaaq, Johan Frederik Zeeb. Johan Frederik 1. september fagchefitut atorfinippoq, kommune ataani sulisooreernikuugami ilisarisimaneqarluareerpoq, nuannaarutigaarpullu suli kommune ataaniissinnaammat.
Inissisimanermini nutaami kommunep sanaartugassai, nutarterinernillu suliniutit pilersaarusiornerinut naammassineqarnissaanullu akisussaaffik tamakkiisoq tigussavaa, tamatumani illoqarfiit nunaqarfiillu suliniutaat tamarmik, teknikkikkullu atortut illuutillu tamarmik pineqarput. Kommunep illuutaasa sanaartugaasalu ulluinnarni ingerlanneqarnerat, aserfallatsaaliorneqarnerat annikinnerusunillu iluarsartuussinerit isumagissavai. Tamatuma saniatigut sanaartornermi suliniutit pilersaarutaat, aningaasaliissutit piffissaliussallu naammassinissaasa tungaanut malitseqartinnissaat suliarissavaa, suliniutinilu tamani inatsisit eqqortinnissaat, pitsaassuseq qaffasissoq isumannaallisaanerlu qulakkeertassallugit.