1.oktober 2026 aallarnerfigalugu meeqqanut ilinniartitaanermullu pisortaq Kaja Olsen atorfinippoq. Kaja ilinniartitsisutut professionsbachelor ilinniarsimasuuvoq, ukiuni 17-ini ilinniartitsisutut atorfeqarsimavoq. Kaja ilinniartitsisuunermini aqqutissiuisutut ilinniaqqissimavoq, ilaqutariit- klassianilu -aqqutissioqatigiinneq ingerlatsinissamut pikkorissarsimavoq.
Ingerlatsivik Timi Tarni iluani kommunip meeqqanut ilinniartitaanermullu suliassaqarfiata ataatsimut aqunneqarnera ineriartortinneqarnissaanut ulluunerani paaqqinnittarfiit, atuarfiit, ilinniartitaanermut siunnersuisarneq, atuareernerup kingorna ornittakkat sunngiffimmilu aaqqissuussinerit kiisalu MISI-imi siunnersuisarfik akisussaaffigissavai.
Kaja Ingerlatsivimmi Timi Tarnimi suleqatigilluarnissaanik qilanaarivarput tikilluaqqulluarisiullu.