Kommune Qeqertalik (KQ) aamma Utoqqaat Pillugit Oqaaseqartartoq (UPO) attavigatigiinnerunissaq pillugu isumaqatigiissuteqarput
Kommune Qeqertalimmi sumiiffinni utoqqaat inuuniarnerminni atugaasa pitsaanerulersinnisaat siunertaralugu Kommune Qeqertalik Utoqqaat Oqaaseqartartuanik Kista P. Isaksenimik suleqatigiinnissamik isumaqatigiissuteqarpoq.
Suleqatigiinnissamik isumaqatigiissut pillugu Kommune Qeqertalimmi borgmesteri Simigaq Heilmann ima oqaaseqarpoq:
”Utoqqaat oqaaseqartartuallu suleqatigiinnissamik isumaqatigiissuteqarnerput nuannaarutigeqaara pingaartillugulu. Atsioqatigiinnerup saniatigut qaninnerusumik ajornannginnerusumillu attaveqaqatigiinnerulernissarput ilutsinni isumaqatigiissutigaarput. Tamanna utoqqarnut, kommunitsinnut kiisalu utoqqaat oqaaseqartartuanut pitsaasumik sunniuteqarnissaa isumalluarfigaara.”
Utoqqaat pillugit oqaaseqartartoq, Kiista P. Isaksen, oqarpoq:
“isumaqatigiissut manna utoqqaat pitsaanerusumik tusaaneqarsinnaanerulernissaanik, aammalu saaffiginnissutaasartut sukkanerusumik toqqaannarnerusumillu suliarineqarsinnaalersinneqarnissaanik kinguneqassaaq. Oqaloqatigiinneq qaninnerusoq pilersinneqarneratigut ulluinnarni unammillernartut pillugit iliuuseqartoqarsinnaalissaaq – soorlu angerlarsimaffimmi ikiorteqarneq, ineqarnermut tunngasut imaluunniit atugarissaarnermut tunngatillugu. Utoqqaat naatsorsuutigissavaat suleqatigiinneq ammanerulerneranik, paasinninnerulernermik aammalu pisariaqartitaannut tunngaveqartunik aaqqiissutinik kinguneqassalluni.”
Isumaqatigiissut uanni atuarsinnaavat
Kommune Qeqertalimmi Utoqqaat Siunnersuisoqatigiivi qinersineq siulleq pivoq 2023-imi ukiunilu sisamani qinikkat atuuttussaallutik. Piffikkaartumik qinigassanngortittut aallaavigalugit uku maannammut ilaasortaapput:
Qeqertarsuarmi ilaasortaq: Regine Svendsen
Kangaatsiami ilaasortaq Martha O. Adelholm
Qasigiannguani ilaasortaq Erik Larsen-Sørensen
Aasianni ilaasortaq Ovesine Hansen
Akunnaami ilaasortaq Grethe Olsen.
Taakkualu ukiumut minnerpaamik ukiumut sisamariarlutik ataatsimiittarput.
Ataatsimiissutaasullu imaqarniliat Ataatsimiititaliaq Inuit-inut ilisimatitsissutitut qaqinneqartarput taamaalillutik kommunalbestyrelsemi ilaasortat Utoqqaat Siunnersuisoqatigiivisa eqqartugaat ataavartumik ilisimasaqalertarput.
Tulliani utoqqaat siunnersiusoqatigiivinik qinersineq 2027-mi piumaarpoq.