Kommune Qeqertallip Qatserisartui Namminersorlutik Oqartussanit Qallunaat Nunaatalu Upalungaarsimanermi Aqutsisoqarfianit nassiussivigineqarnikuupput annertoorujussuarmik ajutoortoqartillugu, soorlu ikuallarujussuartoqarpat inissiat arlariit angerlarfigineqarsinaajunnaarnerinik, inuit arlalissuit oqqiffissaarutissappata, imaluunniit ukiumi issinnerata nalaani innaallagissiorfik sivisuumik sarfaliorsinnaajunnaarluni ajutuussappat tupersuit oqorsakkat kiassagaallutillu qaammaqqusersorneqarsinnaasut, siniffissaqarlutillu nerisassiorfiusinnaasut perusuersarfissaqartullu imaralugit.
Tupersuit ilaat inini angisuuni - soorlu timersortarfinni, eqaarsaartarfinni katersortarfinniluunniit napparneqarsinnaapput inuit amerlasuut inersuarmi ataasiinnaasumi sanileriiaarlutik nallavilersorlugit oqqiffissinneqarneriniit immikkuutaartunngorlugit alanngiffissalersinnaallutik. Tupersuillu ilaat iluisigut iikkersorneqarsinnaapput ilaqutariit immikkut ataatsimoorfigisinnaasaannik.
Tupersuit, innaallagissiuutit, kiassaatit atortullu allat Aasianni qatserisartunit sungiusaatigineqarlutik nappakaatiterneqarnikuupput, ilaat katersortarfiup iluani kingullerlu silami napparneqarluni. Kommune Qeqertallip illoqarfii Qasigiannguit, Qeqertarsuaq Kangaatsiarlu imaatigut assartuineq ajornarunnaarpat tupersuarnik, kiassaatinik, innaallagissiuutinik, nerrivinnik issiavinnillu upalungaarsimanermi suliaqartut pisariaqalerfiatigut napparasuarsinnaasaannik nassiussuiffigineqassamaarput piareersarnerinilu suliaqartussat pikkorissartinneqassallutik.
