TUSAGASSIUUTINUT NALUNAARUT 17.02.2026
Kommune Qeqertalik ulorianartorsiortinneqarpoq
Allattoq, Simigaq Heilmann Kommune Qeqertalimmi borgmesteri
Siornatigut oqariartuutigereernikuuara Inatsisartut Naalakkersuisullu politikikkut piumassuseqarlutik nuna tamaat ineriartortinnissaanut akisussaaffimmik tigusisariaqartut.
Maanna aperisariaqarpunga Inatsisartunut aammalu Naalakkersuisunut; nunatsinni inoqarfiit minnerusut sumunnaanniarpisigit?
Ernumavunga isorliunerusuni kommunini siunissarput pillugu.
Assersuutissaqqippoq Naalakkersuisut takorluuinerat, Ilulissani GUX-itut ittumik pilersitserusullutik, tamanna Kommune Qeqertalimmut kingunerluuteqassaaq.
Assersuutissaqqippoq peqqinnissaqarfitta aningaasanik atuivallaarujussuarnerata kingunerisaanik nunatsinni isorliunerusuni peqqinnissaqarfinnik sisamap kingorna matusisalerneranut Kommune Qeqertalik eqqugaammat.
Assersuutissaqqippoq aalisarnermut inatsisip nutaap atuutilersinnerani Aasianni ilaqutariit imminnut pilersornerat, anaanap ataatallu ullaakkut makillutik suliartorfissaarunnissaanik kinguneqarsinnaanera, Kommune Qeqertalimmut annertuumik eqquinerluttussaammat.
Assersuutissaqqippoq aningaasarsiornikkut kivitseqataanissatsinnut killiliiuartoq angallannikkut Kommune Qeqertalimmi atukkagut ajorluinnartuusut ilisimaneqareeraluartoq toqqarneqarmat Ittoqqortoormiini mittarfiliornissaq.
Politikikkut oqartoqakkajuppoq nunatta takornariaqarneq aningaasarsiorfigilluarsinnaagaa, tamanna nunatsinni inoqarfinni tamani aningaasarsiorfissatut oqaatigissallugu eqqunngilaq.
Aasiaat ukiorpassuarni suliffeqarnikkut, umiarsualiveqarnikkut ilinniartoqarfittullu ilisarnaateqarpoq, allaat kinguaariit nikinneranni ingerlaqqittumik oqaluttuassaqarfiulluni. Aammaarlunga kommunalbestyrelsi sinnerlugu borgmesteritut oqaatigerusuppara Kommune Qeqertaliup siunissaa ernumassutigigakku. Isumaqarpunga suleqatigiinnikkut aaqqiissuteqarnissarput pisariaqavissortoq. Akisussaaffimmik tiguseqataarusuppugut, kommunerput ineriartortikkusupparput, kivitseqataanissarsili aamma pisariaqartipparput.
Maanna Aasiaat, Aasiannilu ilaqutariit imminnut pilersortut siunissamut nalorninartorsiortinneqarput, tamannalu Kommune Qeqertalimmut annertuumik sunniuteqarnerluttussaavoq. Kommunerput inukilliartorpoq, tamanna bloktilskuditigut malugereerparput. Fabrikki matussagaluarpat ikiorsiissutinut aningaasartuutit kommunip nammatassai qaffarujussuassapput, uani sulisut 115-init kisimik eqqugaassanngillat, taakkumi aamma ilaqutaqarput, taamaammat Aasianni fabrikki matussappat kommunitsinnut ajorluinnartumik kinguneqassaaq. Aalisarnermut inatsit akuerineqarmat namminersortuni ingerlaannartumik malungineqareerpoq, sanaartornissamut annertunerusunut tunuartertoqalereernikuummat, taamaattumik Aasianni namminersorluni inuussutissarsiortuni siornali malunniuteerpoq.
Taamaammat iliuuseqaqatigiinnissaq tamatsinniimmat oqaloqatigiinnikkut qanoq iliorluta uannga pinngitsoortitsinissarput suliarisariaqarparput. Aaqqiissutaassanngilaq fabrikkit allat illoqarfinniittut matunerisigut Aasianni fabrikki ammatiinnarneqassasoq, nunamili raajanik tunisassiornermut aaqqissuusseqqittoqartariaqartoq isumaqarpugut.
Kommune Qeqertalimmi pissutsinut nalorninartorsiorfiusunut aaqqeeqatigiinnissamut, neriuutigaara Inatsisartut Naalakkersuisullu akuersaarlutik akisussaaffimmik tiguseqatigiinnissamik pisariaqarluinnartumik oqariartuuteqarnermut qisuariarumaartut.
Kommune Qeqertalimmi borgmester
Simigaq Heilmann