Ukuusut: Saamerlermiit Gertrud Hansen, Kristine Inûsugtok´, Paninnguaq Jeremiassen, Johanninnguaq Sandgreen aammalu Ane Dorthe Larsen.
Peqqissaanermi ikiortit 23-t akornanni Aasianneersut tallimaallutik ilinniarnerminnik naammassinnipput, uppernarsaatillu tunniunneqarlutik ulloq januaarip ulluisa 22-anni 2026.
Ilinniagaq tusarnaarnermik oqaloqatigiittariaatsinillu ilinniarfiusoq ingerlanneqarpoq, peqqissaanermi ikiortitut sulinermi piginnaasatut pingaarutilittut aamma ilaasoq.
Sullissinerminni toqqissisimanermik nuannaarnermillu inuiaqatigiinni pilersitseqataanissamik pingaarutilimmik inissisimapput, aammalu pisortani sullissisuni immikkut ilisimasaat pisariaqartinneqarluarluni.
Ilinniarneq piginnaasanik naliliineq (realkompetencevurdering) tunngavigalugu ingerlanneqarsimavoq, ukioq ataaseq qaammatinillu pingasunik sivisussuseqartumik.
Ataani Utoqqaat Illuat Aasianni Pisortap tulliata pilluaqqussutaa ilannguppara:
Tulluussimaarutigingaarparput aammalu tuppalliutigeqaagut suliarisartakkatik ilinniakkaminnut tutsinnerini angusarissaarissutigimmassuk.
Aammalu nuannaarutigingaarparput Utoqqaat Illuat Aasiaat ilinniarsimasunik sullissisussanik pisuunnguallammat. Siunissamilu atorneqarluassaqaat qanortoq ilinniagaq siulleq naammassineranni ineriartortitsinermi imminullu ineriartorteqqinnissamut atorluarimaaraat neriulluaatigeqaarput.
Tamannguisa ilaqutaalu tapersersortiginikuusaalu ilanngullugit pilluaqqungaarpagut.