Ullumikkut pingasunngorneq oktobarip aallaqqaataani nunarsuaq tamakkerlugu Naalagaaffiit Peqatigiit utoqqarnut ullorititaa aamma Kommune Qeqertalimmi nalliussineqarpoq.
Aasianni Utoqqaat Peqatigiiffiat Iparannguaq kommunip silataanukarmata sila ukiarpalaarluni nillerpallaaqimmat ingerlaannaq borgmesterip ataatsimiittarfimmut isertippai. Utoqqaat iseramik siullermik utoqqaqatertik Nuummi utoqqaat illuanni puigortunngortut inaanni ajunaartoq eqqaarniarsinnarlugu erinarsoqatigeeqqaarput atorlugu ”Aqqutissaq nalunartoq”.
Kaffimik tamulugassanillu tigusereermata borgmesteri oqaaseqarpoq.
Ilaatigut ima oqarami: ”Utoqqarnik isumassuinerup pitsaasuunissaa eqqarsaatigalugu, isumaqarpunga sullissineq inuppalaarnerusoq, naapitsinerusoq, sullitallu pisariaqartitaannik aallaavilik suliarisariaqaleripput, taannalu kommunalbestyrelsi peqatigalugu suliaqarnissarput qilanaarivara.
Nammineq aanaajaa aataajaaqarlunga peroriartorpunga, utoqqartaqarluni inuuneq uannut pingaaruteqartut ilagaat, tarnikkut nukittussusermik pissarsiffiginikuuara, aamma ilinniarfigisimavakka akisussaassuseqarluni inuuneqarnissap, isummersinnaallunilu inuiaqatigiinni akuunissap minnerunngitsumillu utoqqarnik isumassuinissap pingaaruteqarneranik. Ullumikkut tamarmik peerutereersimagaluartut pisussani angisuuni, makkutut ittuni isissagaangama iseqatigalugit misigiuaannarpunga. Soorlu aamma massakkut najuunninni taama misigisunga. Una oqaatiginiarpara: Isumaqarpusi!”
Taama ilaatigut borgmesteri Simigaq Heilmann oqarpoq.
Utoqqaat nuannaajallaatigisaannik oqaluttuunneqarput borgmesteri Aasiannut nuussimasoq.
Utoqqarnik naapitaqarneq uummaarissumik, oqaaseqarfiulluartumik ingerlanneqarpoq.
