Allattoq, Simigaq Heilmann Kommune Qeqertalimmi borgmesteri
Ilulissani GUX-mik pilersitsinissamik suliniuteqarneq Avannaani ilinniarnertuunngorniarfeqareersumut kingunerluttussaammat, ilinniarfigerusutamik nammineq qinigassaqarsinnaaneq tapersersoraluarlugu inatsisartut apererusuppakka ilinniarfinnik allanik eqqarsarnissaq piffissanngunnginnersoq?
Massakkut oqaluuseraasi inuusuttut silarsuarmut appakaannissamut immersorneqarnissamullu piukkunnarseruttortut angajoqqaatik qimattarmatigit tamanna pinaveersaarniarlugu Ilulissani GUX-qalernissaq.
Ullumikkut meerannguit suli angajoqqaaminnik pisariaqartitsisut nunaqarfinni najugaqartuunertik pissutigalugu suli ukiukillutik angajoqqaatik qimallugit illoqarfinnut qaninnernut atuariartortinneqartarput. Taakkumi?
Meeqqat amerliartunngillat, siunissaq ungasinnerusoq eqqarsaatigalugu GUX-it tallimaasut arfinilinngussappata piviusorsiorinngilara Jens Napaattuup siunnersuutaa. Iluareqqusaarnertut taarusunneruara.
Ukiut ingerlaneranni GUX-it nunatta iluani amerliartorneranni aammalu attaveqaatit atorlugit ilinniartitaaneq piulermalli Aasianni ilinnialertartut ikiliartornikuupput, taamaammat naatsorsuutigilluinnarsinnaavarput Ilulissani GUX-mik pilersitsisoqarpat suli Aasianni ilinnialersartut ikilisinnaanissaat. Tamanna ernumassutigaara. Aasiaammi ilinniartoqarfiunera illoqarfitsinnut kommunitsinnullu iluaqutaammat ilinniartukillineratigut sunniutissaat pitsaanavianngitsut kialluunniit takorloorsinnaavaa.
Inatsisartut kaammattorusuppakka sumiiffitsik kisiat pinnagu nunatsinni ilinniarfimmik nunatta inuisa tamarmik ilinniarfigisinnaasaannik pilersitsinissamik suliniaqqullugit.