Qaatunniaritsi, uagut aamma nunatsinni najugaqarpugut
Allattoq Kommune Qeqertalimmi borgmesteri Simigaq Heilmann
Illoqarfinni isorliunerusuni atukkagut aattaat taama toqqissisimananngitsigilerput. Qeqertarsuarmi peqqinnissaqarfipput sisamap kingorna matusalerpoq. Taassuma kinguneraa uninngavimmiittoqarsinnaajunnaartoq, uninngavimmiittussallu Aasiannukaanneqartariaqalernerat. Taamatullu nakorsiarlutik angalasussat biiliunneqarsinnaajunnaarput.
Qeqertarsuarmi innuttaasut nunatsinni allatulli innuttaasuniit allaanerunngittumik nunatsinnik nammaqataapput. Assigiimmik akileraarpugut, kisianni atukkagut angallannermiit, peqqissutsikkut sullinneqarnermut, ulluinnarnilu inuuniarnermut ajornerulersinneqaraluttuinnarput.
Piffissaq ornipparput angallannikkut naatsorsuuteqarfigisinnaajunnaagassarput. Nakorsiarlutik, timersorlutik sulillutik namminerluunniit angalaniartut pilersaarutitik malillugit angalasinnaajunnaassapput.
Aattaat taama pisariaqartigilerpoq sumiiffitsinni atukkatta toqqissisimanartuunissaat. Akuerineqarsinnaanngilaq Qeqertarsuarmi uninngaviit pioreersut matullugit Aasiannut uninngatitsiartortariaqarnermik aaliangerneq, allaat illoqarfimmut allamut nakorsiarniartut ambulancenik biiliunneqarsinnaajunnaarsillugit.
Qeqertarsuaq taxa-qanngilaq, illoqarfimmut allamut nakorsiartariaqartut qanorilillutik aallariartorsinnaassappat?
Qeqertarsuaq 800 sinnilaarlugit inoqarpoq, illoqarfik angisoorsuunngikkaluarluni ukiorpassuarni aalajaattunik toqqissisimaffigisatsinnik nunaqavissunik peqqissaasunik sullissisoqarpugut. Ernumavunga sulisut pikkorissut illoqarfipput qimattariaqalissappassuk.
Inuup inuuneranik naleqarsinnaavoq.
Ukiorpassuit pisariaqartinneqarpoq anguniagaasimallunilu portørit marlunngortinneqassasut. Tassami sakkortuumik pisoqartillugu ornigutipallannissamut ilaatigut minutsit 45-t tikillugit pissarsiniartoqartarpoq, orniguttussamut ujartuinermut piffissaq atorneqartariaqarmat.
Tamanna inuup inuuneranik kinguneqarsinnaavoq, ikiortariaqalersillutami asuli saaffiginninneq ajorpugut.
Isumassuisussaatitaavugut.
Peqqissaaviup peqqinnissaqarfiullu pingaartitaraat piartortut kissaataat malillugit isumassuissallutik, maanna illoqarfik qimallugu uninngavimmiisitsisariaqalerneq pingaartitat tamaasa uniorlugit tamanut toqqissisimannginnermik pilersitsivoq, oqartariaqarpungalu aaliangerneq una alianartuusoq.
Innuttaasut, peqqinnissaqarfimmi sulisut, ulloq unnuarlu utoqqarnik innarluutillinnillu sullissisut paasisinnaavakka toqqissisimanngimmata, borgmesteritut pisussaaffigaara innuttaasut illersussallugit, taamaammat Naalakkersuisut aammalu peqqissutsimut naalakkersuisoq sakkortuumik piumafferusuppakka politikkikkut aaliangeqqullugu aaliangerneq una namminermi politikkikkut anguniakkanut illersorneqarsinnaanngimmat unitsinneqassasoq.
Nunarput inuuffigiuminarsarumallugu anguniakkasi pimoorullugit timitalertariaqarpasi.