Inuk Davidsen 68-inik ukioqartoq ukiut qulit missaanni akissaq eqqarsaatiginngikkaluarlugu illoqarfimmi najugarfigisami tungaanni eqqagassanik katersisarpoq.
Ullumikkut Kommune Qeqertalik Inuk Davidsen qujaniarfigalugu ilasseqatigiinneqarmat Inuup ilaquttani, nukkani, soralussani, illortaani ikinngunnilu peqatigai - Kommunimiit ilasseqatigiinnermut
Borgmester Simigaq Heilmann qujaniarnermini ilaatigut ima oqarpoq:
”- Kommunerput sinnerlugu qujaffigerusullutit maani katersuuppugut, suliarnut allanngueqataanernullu qujajumalluta, taamalu sulisimanerit pingaaruteqartuusoq ersersikkumallugu.
Innuttaasut illoqarfimminni pinngortitamilu saligaatsuutitsinissamik pingaartitsisut akisussaaffimmillu tiguseqataasinnaasut qujassutissaqarfigaagut. Illit aqqutigalutit qujassutiga apuukkusuppara, qujanaq saligaatsuutitsinissaq pinngortitamillu paarsilluarnissaq kommuni utaqqinngikkaluarlugu nammineerlutit akisussaaffimmik tiguseqataasarninnut. Tamatsinnut maligassiuivutit.” Taama ilaatigut borgmester Simigaq Heilmann oqaaseqarpoq.
Inuk Davidsenip maluginiarsimavaa aallarteqqaarami eqqagassat amerlanerujussuusimasut, soorlu iliveqarfiup eqqaani. Massakkut, soorlu iliveqarfiup eqqaani eqqagassat malunnartumik ikileriarujussuarsimapput.
Otto Sandgreen, Aasianni Teknik avatangiisinullu ingerlatsinermut aqutsisoq oqarpoq ukiumoortumik ”Saligaatsoq” kommunimiit ingerlanneqartartoq. Kisiannili ukiumut ulloq ataaseq ingerlanneqartarluni. Maluginiarpaali aamma Inuup piumassutsini atorlugu saliisalerneratigut inuit arlallit sunnersimagai.
Ilassinninneq kaffesoqatiginnermik tamulugassanillu tamusseqatigiinnermik eqqisseqqinnaarluni oqaluttuaqattaannertaqalaartumik ingerlanneqarpoq.
