Sapaat aggustip pingajuani Kangaatsiami Qooqa Festival ingerlanneqarmat Kangaatsiami Timi Tarni aamma Qeqertalik Business Coucil suleqatigiillutik Qooqa eqqaaniarlugu eqqaassutissamik uleersisoqarpoq. Ullormi tassani Kommune Qeqertalimmiit kommunalbestyrelsemi ilaasortaq Sussi Adelholm oqaaseqartuuvoq. Oqalugiaata uani atuarsinnaavat:
”Nalitsinniinnaanngitsoq Qooqa tusaamasaalluni Kalaallit nunarput tamakkerlugu inuiaqatigiittut oqaluttuaq ilisimalluagarput 1700-kut nalleriartorneranni ingerlanerannilu pisimasuutinneqartoq; Ole Brandtip atuakkiaa nangeqattaartoq kalaallit inuusaasiannik naleqartitaannillu oqaluttuat nalitsinni kingornussatta pingaaruteqarluinnartut ilagilluinnarpaat.
Qooqa tassaasimavoq inersimalerami piniatorsuanngortoq ikinngunnilu Mikisuluk suli meeraallutik angutaarseramik inoqutiminnut pilersuisunngorsimasut peroramillu nunaqqatigiinni qitiulluinnarsimasut.
Manna sumiiffipput eqqaalu oqaluttuami ilaatinneqarluinnartuupput Qooqap tassa angallavigalugu piniarfigilluarsimasaa. Oqaluttuap sorpassuarnik nunatsinni pinngortitami imaannaanngitsumi qanga inuunermik takorlooruminartumik atuakkiarineqarsimasup ilaatigut qiteraa Qooqa perornermini ikinngunnilu Mikisuluk pisussaaffeqartut inuiaqatigiinnit naatsorsuutigineqareerluni perorunik angumminnik toqutsisoq Saqu akiniarlugu toqukkumaaraat.
Taamanikkut akiniummik pigisaqartuunerup nalaani inuupput; Qooqap ileqqoq tamanna kipitissimavaa; akerleralugu akiniussisussaatitaalluni toqutsineq. Aaqqiangiinnerup kinguneranik toqutsineq avissaartuunneq toqutsisussaatitaanerlu akuersaarsimanngilaa. Inuuneq aarlerisaqarlunilu toqqissisimananilu eqqortuusorisimanngilaa.
Tamanna pillugu Qooqap piniartorsuusimasup inuiaqatigiinnguatut aaqqiisarnissamik isumakkeerinninnissamillu pingaartitsilluni ujartuisimasup eqqaaneqarnera ataqqinartuuli.”
Ole Brandtip atuakkiaa Qooqa
Qooqap eqqaasutissaa
Inuit eqqaasusiinermut najuuttut
Soorunami aamma erinarsortoqarpoq
Aana Qooqap ilivia