Aasianni qatserisartut tallimat biilersuarnik 32 miiterinik atuinermut ingerlatsinermullu ulluni 9. aamma 10. august 2025 pikkorissareerlutik ingerlatsisinnaasutut akuerisamik allagartartaarput.
Tummerarsuit atorneqarnissaannut periarfissat assigiinngitsut ilinniarneqarlutillu misilerarneqartut ilaat makkuupput:
- Illorsuarni portusuuni atorneqassappata qanoq inissinneqassappat init quleriit tamaasa angusinnaanngussagaanni
- Piffinni inissakittuni atussagaanni qanoq inissinneqassanersut
- Portusuumi annaassiniassagaanni (højderedning) atortut sumut qajannaarfissaqarnersut
- Akiuserluni annaassiniarnermi akiutinut ilitsivia akiullu kivitsissutsissutigissagaanni qajannaarfissaatut periarfissat marluk atornissaat
- Umiarsuarni/angallatini talittarfimmiittuni aqqunartoqarsimappat last-imiit/angallammiit akiuserluni qaqitsineq
- Illorsuit portusuut qaliani ikuallattoqassappat vandkanon slange-luunniit qatserut atorlugu tummerarsuit isuiniit qamisaanernut atortut
- Illorsuit portusuut qaavini silaannarissaaffissamik putuliussagaanni pilattuut kalunnilik (motorkædesav) atorlugu putuliussagaanni nakkarnaveeqqutit (faldsikring) atornissaat
- Tummerarsuit kivittaatitut (kran) atussagaanni oqimaassutit 400 kg imaluunniit 4000 kg angullugu kivitsinermut qajannaarfissaat
- Qanoq takitigisumut/portutigisumut siaarneqarsimallutik uertinnerpaaffigisinnaasaata killissai misileraaffigalugit
- Talittarfimmi sanaartukkalluunniit akornanni ikaartarfittut atussagaanni qanoq iliuusissat
- Anori 12,5 m/s qaangerpagu tamakkiisumik siaarsinnaajunnaarfiini qanoq portutigisumut atorneqarsinnaaffiisa misilerarneri
- Atortuisa qarasaasiatigut aqutsisui ajutuussappata sarfaliuut atortoralugu aqutsineq
Taama nassuiaavoq Aasianni qatserisarut pisortaat David Løvstrøm.
Pikkorissarneq pikkorissartunit pissarsiffiulluarsimasoq David Løvstrømip naggasiutigaa.
Saamerlermiit: David Løvstrøm, Johan Kaspersen, Helenannguaq Stork, Kim Gedionsen & Niels Sandgreen.
