Kommunimut pilersaarutip 2018-2030 Kommune Qeqertalik tapia nr. 10, 11 taavalu 12-nut siunnersuutinik tusarniaaneq
Ataatsimiititaliap INUA kommunimut pilersaarutip tapiatut siunnersuutit nr. 10, 11 taavalu 12 tamanut tusarniutigineqassasoq ulloq 07.04.2025 aalajangerpaa.
Kommunimut pilersaarutit tapiata siunertaraat Kangersunermi Kuussuullu Tasiani erngup nukinganik innaallagissiorfiliornissaq, innaallagissap aqqusersuinissaq sullorsualiornissarlu ilanngullugit, taavalu Aasianni Qasigiannguanilu erngup nukinganik nukissiorfissamut nutaamut atatillugu sarfap sakkortussusaanik allanngortitsisarfimmik sananissap periarfissinnissaa.
Kommunimut pilersaarutip tapiatut siunnersuutit nr. 10, 11 taavalu 12 piffissami uani tamanut tusarniutitut saqqummiunneqarpoq: 06.06.2025-miit 01.08.2025-mut
Kommunimut pilersaarutip tapiatut siunnersuut sapaatip-akunnerini arfinilinni 8 tusarniutaavoq. Piffissami tassani kikkut tamarmik – innuttaasut, suliffeqarfiit, paaqqinnittarfiit, peqatigiiffiit il.il.. – akerliullutik nalunaaruteqarsinnaapput, oqaaseqarsinnaapput aamma allannguutissatut siunnersuuteqarsinnaapput.
Illit tusarniutitut akissutit kommunimut mailikkut uunga plan@qeqertalik.gl. tunniussinnaavat. Akissutit najukkanni Sullissivimmut aamma tunniussinnaavat imaluunniit kommunimut nassiussinnaavat.
Tamanut saqqummisitsinerup kingorna kommunalbestyrelsip akerliulluni nalunaarutaasinnaasut aamma allannguutissatut siunnersuutit suliarissavai tamatumalu kingorna siunnersuut inaarutaasumik akuerineqassaaq.
Tusarniaanermut akerliunissamut pissutissaqaruit imaluunniit oqaaseqaatissaqaruit, taakku kingusinnerpaamik kommunimit tiguneqareersimassapput ulloq 01.08.2025.
