Inatsisartunut qinersineq 2025

Inatsisartunut qinersinissamut tunngasumut nalunaarut

Inatsisartunut nutaamik qinersinissaq pillugu Inatsartut inatsisaat 4. februar 2025-meersoq naapertorlugu Inatsisartunut qinersinissap ullussaa aalajangerneqarpoq pissasoq:
Marlunngorneq 11. marts 2025 nal. 09:00 – 20:00

Partiit ullormi qinersinissamik suaarutiginninnermi Inatsisartuni ilaasortaatitaqanngitsut, qinersinermullu qinigassanngortitsiniartut qinersisartunik nalunaarutigineqartunik Kalaallit Nunaanni Inatsisartunut qinersisarneq pillugu Inatsisartut inatsisaanni § 12-imut (Inatsisartunut qinersisarneq pillugu inatsit) naammassinnittut 856-inik katersisimassapput.

Inatsisartunut qinersisarneq pillugu inatsit, § 12 Imm. 4 naapertorlugu partiimik nalunaarutiginninneq qinersisartut partiimik nalunaarutiginnittut uppernarsaatitut allagaannik ilaqartinneqartassaaq.

Uppernarsaatitut allakkami ilanngullugit nalunaarutigineqartassapput qinersisartut aqqi tamakkiisut, ullut inunngorfii sumilu najugaqarneri aamma qinersisartunit namminermit atsiugaallutillu ulluligaasimassallutik. Taakkua saniatigut uppernarsaatitut allakkani ilanngullugu allassimasassaaq qinersisartut Inatsisartunut qinersisinnaanermut piumasarineqartunik nammassinnissimaneri pillugu inuit aqqinik nalunaarsuiffimmi pisortaasup uppernarsaataa atsiugaq.

Uppernarsaatitut allakkat nalunaarutiginninneq ukiumik ataatsimik sinnerluguluunniit sioqqullugu allanneqarsimasut naatsorsuutigineqarsinnaanngillat. Taamaapportaaq partii ataaseq sinnerlugu nalunaarutiginninnermi qinersisartut uppernarsaatitut allagaannut tunngatillugu. Atsiornerit Qinersinermut Ataatsimiititaliap allattoqarfianut tunniunneqareersimassapput, kingusinnerpaamik: 

Marlunngorneq 11. februar 2025 

Qinersinermut inatsisip §§ 13-17 naapertorlugu Inuit qinigassanngorsinnaatitaasut partii sinnerlugu imaluunniit kisimiillutik qinigassanngortittut, kattusseqatigiinnilluunniit qinigassanngortittutut Inatsisartunut qinigassanngortissinnaapput. Kisimiilluni qinigassanngortissinnaassagaanni qinigassanngortitsisut ikinnerpaamik 40-nik amerlassuseqassapput.

Qinersinermut inatsisip § 17-iat naapertorlugu nalunaarummi allassimassapput qinigassanngortitsisut tamarmik immikkut aqqi, inuuii, atorfii najugaalu. Qinigassanngortitsisut ilaat ataaseq nalunaarut pillugu qinigassanngortitsisut tamaasa sinnerlugit saaffiginnissuteqarfigineqarsinnaasutut allassimassaaq.

Inatsisartunut qinersinissamut qinigassanngortittussanik nalunaarutiginninneq kommunimi qinersinermik siulersiusunut kingusinnerpaamik tunniunneqassaaq:

Marlunngorneq 18. februar 2025 nal. 12.00

Hans-Peder Barlach Christensen
Qinersinermi Ataatsimiititaliami siulittaasoq

 
Inatsisartut inatsisaanni nr. 14, 24 nov. 2020, Inatsisartut qinersisarneq pillugu Inatsisartut inatsisaat:

Qinersinermik siulersuisut

§ 9. Qinersineq kommunini tamani qinersinermik siulersuisunit piareersarneqarlunilu aqunneqassaaq. Qinersinermik siulersuisut qinersinerup piareersarneqanera kommunimi allattoqarfimmut isumagisassanngortissinnaavaat.

Imm. 2. Qinersinermik siulersuisunut ilaasortaassapput borgmesteri, siulittaasuusoq kiisalu kommunalbestyrelsimi ilaasortat marluk qanoq amerlatigisunik ilaasortaatitaqarneq tungavigalugu kommunalbestyrelsimit qinikkat. Kommunalbetyrelsimi ilaasortaaqatigiit pineqartumik toqqaasimasut sinniisussamik toqqaassapput.

Imm.3. Qinersinermik siulersuisunut ilaasortaq qinigassanngortippat ilaasortaq pineqartoq qinersinermik siulersuisunit ilaasortatut tunuassaaq sinniisussatullu toqqagaq qinersinermik siulersuisunut ilaasortanngorluni. Kommunalbestyrelsimi ilaasortaaqatigiit pineqartumik toqqaasimasut akunnerminni sinniisussamik nutaamik toqqaassapput.

imm. 4. Borgmesteri qinersinermik siulersuisunit tunuarpat qinersinermik siulersuisut ilaasortamik akornannit siulittaasussaminnik nutaamik toqqaassapput. Siulittaasup nutaap sinniisussaa qinersinermik siulersuisunut ilaasortanngussaaq, kommunalbestyrelsimilu ilaasortaaqatigiit pineqartumik toqqaasimasut akunnerminni sinniisussamik nutaamik toqqaassallutik.

Imm. 5. Qinersinermik siulersuisunut ilaasortatut toqqarneqartut atuuffimmut akuersinissaminnut pisussaaffeqarput.

Qinigassanngortissinnaatitaasut

§ 13 Qinersinermut qinigassanngortissinnaatipaapput § 14 naapertorlugu partii sinnerlugu qinigassanngortitut, § 15 naapertorlugu partiit avataasigut qinigassanngortitut.

§ 14. Partii sinnerlugu qinigassanngortitut nalunaarutigineqarnerat Qinersinermik ataatsimiititaliap partiinut nalunaarsuiffissatut allaffissiaatigut pissaaq. Nalunaarut Qinersinermik siulersuisunut tunniunneqareersimassaaq kingusinnerpaamik qinersinissaq sapaatit akunnerinik pingasunik sioqqullugu nal. 12.00

§ 15 Partiit avaatigut qinigassanngortittut nalunaarutigineqarnerat Qinersinermik ataatsimiititaliap qinigassanngortittunik nalunaarsiuffissatut allaffissiaatigut pissaaq. Nalunaarutiginninneq Qinersinermi siulersuisunut tunniunneqareersimassalluni kingusinnermik qinersinissaq sapaatit akinnerinik pingasunik sioqqullugu nal. 12:00

§ 19 Qinigassanngortittup qinigassanngortinnermik nalunaarut tunniunneqareersimasoq qinersinermik siulersuisunut qinersinissaq kingusinnerpaammik sapaatit akinnerinik pingasnuik nal. 12:00 sioqqullugu saaffiginninnermigut tunuartissinnaavaa.

imm.2. Qinersisartup § 17, imm. 1 naapertorlugu qinigassanngortittumik qinigassanngortitseqataasimasup qinigassanngortitseqataassutini utertissinnaanngilaa qinigassanngortinnermut nalunaarut qinersinermik siulersuisnut tunniunneqareersimappat.

Qinersinissamut piareersarneq

§11. Qinersinermik siulersuisut § 8, imm. 3 naapertorlugu Qinersinermut ataatsimiititaliamit nalunaarut naapertorlugu piffissaq taasiffissaq piaarnerpaamik nalunaarutigissavaat. Tumamunnga peqatigitillugu taasiartorfissat ataasiakkaat inuillu taasiartorfissanik ataasiakkaani taasisitsinermik aqutsisussatut toqqarneqarsimasut aqqi tamanut nalunaarutigineqassapput. Tamatuma saniatigut qinigassanngortitanik nalunaaruteqarnisamut piffissarititaq tamanut nalunaarutigineqassaaq.

Qinersisinnaatitaasut allattorsimaffiat

§ 22. Qinersinermik siulersuisut inuit kingusinnerpaamik ullormi qinersivissami §§ 1 aamma 2 naapertorlugit qinersisinnaatitaasutut piumasaqaatinik naammassinnittut, aammalu Inunnut Nalunaarsuutit Eqiteruffianni kommunimi pineqartumi najugaqarlutik nalunaarsimasut allattorsimaffiannik suliaqassaaq, taamaattorli § 24 takuuk.

Imm. 2. Qinersisinnaasut allattorsimaffianni ilaatinneqassapput inuit qinersinissaq sioqqullugu kingusinnerpaamik sapaatit akunneri arfinnillit kommunimut nuussimasut aammalu kingusinnerpaamik ulloq taanna nuunnerminnik Inunnut Nalunaarsuutit Eqiterffiannut nalunaaruteqarsimasut.

Imm. 3. Qinersisartut qinersinissaq sioqqullugu kingusinnerpaamik sapaatit akunneri arfinillit kommunip iluani nuussimasut aammalu kingusinnerpaamik ulloq taanna nuunnerminnik Inunnut Nalunnaarsuutit Eqiteruffiannut nalunaaruteqarsimasut najugarilikkaminni allassimallutik qinersisinnaasut allattorsimaffiannut ilangunneqassapput.

Imm. 4. Qinersisartut qinersinissaq sioqqullugu kingusinnerpaamik sap. ak. arfinillit iluanni kommunimut allamut nuussimasut imaluunniit kommunip iluani allamut nussimasut imaluunniit nuunnissaminnik kingusinnerpaamik ulloq taanna nalunaaruteqarsimasut ulloq taanna tikillugu najugarisimasaminni najugalittut qinersisinnaasut allattorsimaffianni nalunaarsorneqarsimaannassapput.

imm. 5. Qinersisartut Kalaallit Nunaata avataani najugaqarallartut § 2-milu piumasaqaatinik naammassinnittut § 24 naapertorlugu ulloq qinersivissaq kingusinnerpaamik saapaatit akunnerinik pingasunik sioqqullugu tamanna pillugu aalajangiisoqarsimappat qinersisinnaasut allattorsimaffiannut ilanngunneqassapput.

§ 23. Inuit sumiiffinni Kalaallit Nunaata kommuninut aggorneqarnerata avataanniittut ullormilu qinersivissami qinersisinnaatitaasut, kommunimi aalajangersimasumik najugartik attatiinnarsimanngikkunikku Kommuneqarfik Sermersuumi qinersisinnaasut allattorsimaffianni immikkoortumi immikkut ittumik ilanngunneqassapput.

imm. 2. Inuit qinersisartut allattorsimaffiannut ilanngunneqareernerminni Kalaallit Nunaanni aalajangersumik najugaqarnerminnik unitstsisut qinersinermik siulersuisunit qinersisinnaasut allattorsimaffiannit peerneqassapput, taamaattoq takukkit § 24, imm. 1-3.

Imm. 3. Qinersisinnaasut allattorsimaffiisa suliarineqartarnerat pillugu aalajangersakkanik sukumiinersunik Naalakkersuisut aalajangersaasinnaapput, ilanngullugit qinersisinnaasut allattorsimaffii digitalinngorlugit.

§ 24. Qinersisartut § 2-mi pineqartut qinersisinnaasut allattorsimaffiannut ilanngunneqassapput imaluunniit kingullermik qitiusmik inuit nalunaarsimasimaffianni, Det Centrale Personregisterimi, nalunaarfigisimasaminni qinersisartut allattorsimafiannut ilaatinneqaannassallutik qinersisinnaasut allattorsimaffiannut ilanngunneqarnissamik qinnuteqaat kommunimi tassani qinersinermik siulersuisunut imaluunniit kommunit aggoneqarnerisa avattaanniikkaanni Kommuneqarfik Sermersuumut tunniunneqassaaq.

imm. 2. Imm. 1 malillugu qinerisisinnaasut allattorsimaffiannut ilanngunneqarnermik aalajangiineq ullormit aalajangiinerup ulluanit naatsorsorlugu ukiuni marlunni atuutissaaq.

imm. 3. Qinersisartut Imm. 1 naapertorlugu Qinersinermik siulersuisut aalajangiineri sapaatit akunnerinik marlunnik piffissaliussap iluani Qinersisarnermut ataatsimiititaliamut suliassanngortinneqarsinnaapput.

Imm. 5. Qinnuteqaatip tunniunneqarnissaa suliarineqarnissaalu pillugit aalajangersakkanik erseqqinnerusunik Naalakkersuisut aalajangersaasinnaapput, ilanngullugu digitalimik qinnuteqaatit.

§ 25. Qinersisinnaasut allattorsimaffiat kommuninit tamanit immikkut suliarineqassaaq. Qinersisinnaasut allattorsimaffiat taasiartorfissanut tamanut immikkut immikkoortulerlugu suliarineqassaaq.

imm. 2. Qinersisinnaasut allattorsimaffiat qinersisartut aqqinik qinersisartullu inuuiinik kiisalu qinersisartut aqqinik kurydsiliiffissamik imaqassaaq.