Tallimanngorneq januaarip ulluisa qulinganni, Kommune Qeqertalimmi Borgmester Ane Hansen suliffeqarfiit tamalaat pisortaannik, kiisalu peqatigiiffiit siulersuisuinik Kommune Qeqertalik tamakkerlugu ilassinnippoq.
Borgmester Ane Hansen tikilluaqqusinermini naatsumik ima oqaaseqarpoq. ”Sanaartugassanut aningaasaateqarfik ukioq 2024-p naanerani 84 mio. koruuninik imaqarpoq, taakkulu saniatigut 53,7 mio. koruunit sanaartugassanut aningaasaliissutigineqarlutik. Taakkuuppullu ukiuni tulliuttuni sanaartugassanut aningaasaliissutaasut. Allanilli aamma unammilligassaqarpugut, tassa isumaginninnikkut inatsisilianik sukaterinerit. Tamakkulu pillugit innuttaasut qanimut suleqatiginissai anguniarneqarpoq”.
Ukiortaami ilassinninnermi oqaaseqartussanik aamma Kommune Qeqertalimmi Borgmester qaaqqusisarpoq, ukioq mannalu aamma taamaaliorpoq. ESANI A/S-imi siulittaasoq Nicolai O. Jensen aamma Qeqertalik Businessimi Councilimi takornarialerinermi sullissisoq Navarana Bidstrup.
ESANI A/S-imi siulittaasup eqqaavaa ukioq kingulleq tassaasoq misileraaffiusoq, tassa ilaatigut attaveqaqatigiinnikkut ilungersuanartorsiorsimallutik. ESANI A/S-imiit naatsorsuutigineqarpoq tamakkiisumik sulilersinnaassallutik taamaalilluni piujuartitsinermik eqqakkanillu isumannaannerusumik sullissilissallutik.
Navarana Bidstrup Qeqertalik Business Councilimiit ulluinnarni suliarisartakkatik oqaluttuarai.
