Borgmester Ane Hansen:
Tusass-ip pisortaanera, Toke Binzer, nalunaarpoq, immap naqqatigut attaveqaammik nutaamik pilersitsinissaq kissaatigalugu. Tamanna Kommune Qeqertalimmiit tapersiinnarsinnaavarput, nuannaarutigaarpullu, pisortaanerup kingullermik maani tikeraarnerani kissaatigisagut tusarsimammagit.
Immap naqqatigut attaveqaat maanna atorneqartoq kommunitsinni inuussutissarsiortunut innuttaasunullu sunniuteqarluarnikooqaaq, pingaaruteqarluinnarporlu Tusass-ip attaveqaammik nutaamik pilersitsiniarnerani aningaasalersorneqarnissaa pillugu politikkikkut tapersiinissarput.
- 2019-imi immap naqqatigut attaveqaatitigut ajutoortoqarnerani misigipiloorparput soorlu tassa nunarsuaq avatangiiserput peeruttoq. Inuussutissarsiortortatsinnut aningaasarpassuarnik naleqarpoq, aammalu meeqqat inuusuttortagullu ilinniagaqarnissamut periarfissaannik killiliivoq. Tamanna illoqarfitsinni Aasianni, aammami nunaqarfinni malugivarput, tassami Tusass-ip internetianik sukkasuumik ulluinnarni periarfissaalersimasumik amerlaqisugut pinngitsuuisinnaajunnaarsimagatta. Tusass immap naqqatigut periarfissiissutai inuussutissarsiutilinnut iluaqutaanerisa saniatigut meeratagut inuusuttagullu ilinniarnerminnut annertuumik iluaqutigaat, nunarsuup sinneranut attavigissartuupput, Akunnaami meeqqat atuarnermi nalaani oqaatsinik allanik ilinniarnerminni ikingutitik Saint Philippimi Reonimiittumi qarasaasiakkut attavigisarpaat iluaqutigisaminnik.
- Maanna nunat tamalaat akornanni maanilumi tusagassiutitigut atuarsinnaavarput attaveqaatitsinnut ulorianartorsiortitsisinnaasut nutaat takkussimasut. Kommunimi internetsi pisiaraqartilluinnarparput innuttaasunik sullissinitsinni, aningaasanik nuussinerni, ingerlatsinitsinnillu qulakkeerinninnissatsinnut. Aalisartut piniartullu pisaminnik nalunaaruteqarnissaminnut pinngitsoorsinnaanngilaat, aammalu periarfissamik nutaamik pilersitsinikkut meeqqagut ernuttagullu siunissami periarfissaannik nutaarluinnarnik qulakkeerunneqassapput.
- Taamaattumik isumaqarpugut kommunitta siunissaanut pingaaruteqarluinnartoq, immap naqqatigut attaveqaammik pilersitsisoqarnissaa, maanga avannamut kommunerput angullugu. Taamaattumik Naalakkersuisut assut kaammattorpagut, immap naqqatigut attaveqaammik nutaamik pilersitsinissamut aningaasalersuinissaq pissarsiariniaqqullugu, inuussutissarsiortortatta innuttaasullu ullumikkut attaveqaataasa qulakkeernerisa saniatigut periarfissanik suli amerlanerusunik, soorlu takornariaqarnermut, peqqinnissap siunissamilu ineriartortitsinissamut periarfissatta pitsaanerulernissaat pillugu.
Sermitsiami allaaserisaq takuuk