Assiliisoq: Kristian Lyberth, Visit Greenland
Inuusuttut pingasut Qeqertarsuarmeersut siorna aatsaat aallartikkaluarlutik Turismeprisinnapput! Danny Mølgaard, Naja Bjerregaard aamma Steve Broberg Disko Adventuresimik piginnittuupput.
Mianersortumik aallartisarput
Siorna Disko Adventures aallartimmat tassanngaannaq aallartinnaveersaarsimapput, piareersaqqaarluarlutik aallartisarsimapput. Taamaattumillu aamma inuit attaveqatigiittarfii atunngikkallarsimallugit. Taamaakkaluartoq illoqarfeqatigisatik Hotel Disko Island aamma nunaqavissut suleqatigisarnerisigut suliassanik anginerumaanik tigooqqaasarsimallutik. Inuit attaveqatigiittarfii aamma nittartagaq atulertinnagit angallassisarneq pitsaasoq anguniarsimallugu. Inuilli attaveqatigiittarfii atulernerisa kingorna paasinarsivoq sullitat amerliartulersut.
Inerisaaneq aallarteruttorpoq
Disko Adventures siorna aallartikkami ukioq manna angallassineq siulleq marsimi ingerlanneqarpoq, taamaammallu inerisaaneq aallartisarnialeruttorpaat. Suli unnuisarfiuteqanngillat, qaqqalli qaani illuararsereersimapput, taakkulu nutarsarnialerpaat unnuisarfiutitaarnissartik siunartaralugu.
Sullitat assigiinngittaqaat
Disko Adventuresimi sullitagaat assigiinngittaqaat. ullut ilaanni inuit marluk angallassinnaasarpaat, ilaannilu 30-t angallassinnaasarlugit. Europami nunanit assigiinngitsuneersut tallimat tassaasut: Danmark, Tyskland, Holland, Italien aamma Indiamiit tikeraartorereersimallugit Danny Mørlgaard oqaluttuarpoq.
Angallassisarnerit assigiinngitsut arfinillit
Disko Adventuresimit angallatsikkusukkaanni makku misigitinneqarsinnaapput:
- Qeqertarsuup qaavani sermersuarmi snescooterinik ingerlanneqarneq, qimussiussisulerluni akunnerup ataatsip iluani imaluunniit akunnerni marlunni qimusserneq, , angallassisulerni Qorlortorsuarmut pisuttuarneq, kalaallit qimmiinik naapitsineq, angallassisulerluni Kuanninut pisuttuarneq.
Qeqertarsuup nunataa ukiumi, upernaami, aasami, ukiamiluunniit alutornartuaannartarmat Disko Adventuresimut angallatsikkusullutik saaffiginnittut peqqissimissanngeqaat.
Piginneqataasoq Danny Mølgaard ima naggasiivoq: - Greenland Tourism Award 2024-mi ajugaanerput assorujussuaq nukissamik tunisivoq, aammalu suli imminut upperinerulernermik misigiffigaarput.
Ajugaanerput atorluassuarput aamma tutsiuttoqallattaalereerpoq. Nunatta avataaniik aammalumi nunatsinni suliffeqarfitta tatinginassusaanut assorsuaq iluaqutaassasoq naattorsuutigaarput, nittarsaanitsinnilu atorluarsinnaavarput.
Kommune Qeqertalimmiit tapersersorlutigit nersorneqarnerannik pilluaqqungaarpagut.
Greenland Tourism Award 2024-mi peqataasut innersuunneqartullu allat makkuupput: Authentic Greenland Hotel SØMA Nuuk, Water Taxi Arctic Dream APS, East Greenland Sisimiut aamma Guide Greenland.
Asseq Disko Adventuresimiit
Asseq Disko Adventuresimiit
Asseq Disko Adventuresimiit
Asseq Disko Adventuresimiit
Asseq Disko Adventuresimiit