Ataqqinartorsuaq Kong Frederik qulingat nulianilu Ataqqinartorsuaq Dronning Mary, meeqqatillu marlulissat ilagalugit Juunip 29-aniit juulip aallaqqataa ilanngullugu Kommune Qeqertalimmut tikeraarput.
Tikeraarnerat aallartippoq juunip 29-anni Aasiannut tikinneranni. Aasianni Aasiaat Katersugaasiviata saavani tikilluaqquneqariarlutik Kommune Qeqertaliup saavanut pisoqatigiipput, tassani qatanngutigiit Iisaannguaq aamma Ole Schmidtip Killerneersut anorersuartorsuaq sapiitsuliorlutik annaassiniarsimaneranni ukiut 100-t qaangiunnerannut atatillugu eqqaassutissiisoqarpoq. Ataqqinartorsuaq Kong Frederik qulingat nulianilu Ataqqinartorsuaq Dronning Mary eqqaassutissamik uleersipput.
Eqqaassutissiisoqarnissaanut isumassarsisuupput piviusunngornissaanullu sulissutiginnittuullutik Killermiut Schmidtip kinguaavi, siuttoralugu Susanne Schmidt.
Uleersereernerup kingorna Kunngikkut umiarsuaannut Dannebrogimut pisoqatigiillutik ikiartorput. Tassanngaanniit Qeqertarsualiarput.
Aqagukkut Qeqertarsuarmut tikipput. Kunngip ikaartarfiani tikilluaqquneqarput. Hotel Qeqertarsuarmi immikkut qaaqqusat peqatiglugit ullup qeqqasioqatigiittoqarpoq. Kingorna Qeqertarsuarmi kommunep ataatsimiittarfiani INOQATIKKA pillugit saqqummiivigineqarput.
Illoqarfiup arsaattarfianiit Ataqqinartorsuup Kong Frederiup qulingata Royal Race – Family Mile aallartippaa. Arsaattarfimmiit Kuussuup tungaanut utimullu arpattoqarpoq. Kungikkormiut tupaallatsitsipput meeqqatik Ivalo aamma Minik arpannermut peqataatikkamikkik, Minillu arpaliuttuni siullersaalluni tikimmat alutorsaatigineqaqaaq.
Ualilluinnartoq Kunngikkut Attup tungaanukarlutik aallarput.
Attumi tikilluaqqusisoqareermat inoqarfimmik Ataqqinartorsuit Kunngikkormiut takornariartinneqarput. Inoqarfiup ukiut 200-nngortorsiorsimaneranik eqqaassutissamik uleersillutik. Oqaluffik ukiuni 50-nngortorsiortoq takornariarlugu meeqqerivillu alakkarlugu. Tamatuma kingorna inoqarfimmiunut kaffillertoqarpoq aliikkusersuinertalimmik. Tassani aamma Kunngikkormiut aarrup niaquanik tunissuteqarfigineqarput.
Tamakku tamarmik piareermata Kunngikkut umiarsuarminnik Sisimiunukarlutik aallarput.
Tikitatsinni tamani inuppassuit peqataapput, Kunngitaamut, nulianut meeraanullu alutorsaatiginnillutik tikilluaqqusilluarput.
