Inuiattut ullorsiorneq 2024

Inuiattut ullorsiornermi iterfik pujulaarluni ullulluni ilaa seqinnarissuanngorpoq alianaak.

Ullaakkut arfineq-pingasunut kommunep allaffiata silataani erfalasorput amuneqarpoq, borgmester oqalugiarluni, erinarsoqatigiit Aasiaat Nipaat erinarsorlutik, naggataatigullu qamutilittartoqarluni. Tamakku pereermata oqaluffiup tungaanut ingerlaaqitigiinneq katinngatilisaartut siuttuliullugit.

Naalangiartoqareermat Aasiaat Timersortarfiani innuttaasunut ullaakkorsiortitsisoqarpoq.

Ullup-qeqqanut Aasiaanni illoqarfiup immikkoortui marluk (kangiamiut killermiut) arsaaffimmi arsamik unammipput. Tamatuma kingorna Aasiaat Timersortarfiani innuttaasunut kaffisoqatigiissitsisoqarpoq. Kaffisoqatigiissitsinermi kulturikkut nersornaasiisoqarpoq. Ukioq manna (2024) nersorniarneqarpoq peqatigiiffimmi ”Qimmeq”-mi siulittaasoq Mâlâraq Therkelsen. Mâlâraq arnaagaluarluni qimussernermik nuannarisaqartuuvoq, qimussertarninilu meeqqanut ilinniartitsissutigisarlugu; uini peqatigalugu aamma ukiussamut piliniarnermik aallutaqartarput, tamannalu aamma meeqqanut ingerlateqqillugu ilinniartitsisarpoq.

Ulloq pisoqarfioqisoq naggaserlugu pinngitsoorsinnaajunnaasimasarput ukiunik 30-nngortorsiorlugu nalliussiutigalugu ingerlanneqarpoq. Nunarsuaq tamakkerlugu Aasiaat ilisarnaatigilersimasaa Aasiaat Midnight Sun Maraton!

Ukioq manna arpaffiit assigiinngitsut sisamaapput:

4,2 km.

10,5 km.

21 km.

42 km.

Aasiaat Midnight Sun Marathonimi aallartitsisuuvoq avataarsualiartatoq Andreas Mogensen. Taanna ukiup affaa avataarsuaneereerluni nunarsuarmut uteqqammerpoq. Arpanneq takisuujummat soorunami unnuarsuaq qupiinnarlugu arpatoqarpoq. Arpanneq unnukkut nal. 20.00 aallartippoq naammassillunilu nal. 01.30 missaani.