Aammattaarli ukioq 2023 sulisoqarnikkut unammillernartumik inissisimasimavoq, taamaattumillu iliuusissatut pilersaarutit ilai kinguartinneqanngikkunik uninngatikkallarneqartariaqarsimallutik.
Taamaattumik Qeqertalik Business Council A/S 2023-imi akileraarutit akilereerlugit 362.811 koruuninik sinneqartooruteqarsimavoq, tamannalu siulersuisunit piginnittunillu akuerineqarpoq. Sinneqartoorutit allattoqarfiup ilassutaata takornarissanut saaffiginnittarfiliaralugu iluarsaannissaanut atorneqartussatut siunnersuutigineqarsimasut, kommunalbestyrelsimut akuerisassanngortinneqarput.
Sulisoqarnikkut unammillernartorsiortoqaraluartoq ulapaartoqarsimavoq, Ilulissani Nuummilu mittarfissuit atulinnginneranni piareersaatit aallartisarneqartut arlaqarsimallutik.
2023-mi suliarisimasat tigulaariffigalugit
Aammaarluni Inuussutissarsiutitigut Siunnersuisoqarfiup kommunemi inoqarfiit tamakkerlugit tikippaat, suliffeqarfiit aallarnisaasullu ataatsimeeqatigisarlugit, ilaatigut suliniutit kommunalbestyrelse aningaasatigut missingersuusiornermini imarisassaanik aallerfiusimallutik. Inuussutissarsiutitigut Siunnersuisoqarfiup kommunemut sullissinermut isumaqatigiisut aallaavigalugu pisussaatinneqarnermikkut tamanna ingerlassimavaat.
2023-imi Qeqertalik Business Council A/S-ip Qeqertalik nittarsaaniarlugu ilaatigut Frankfurtimi Nordic Workshoppimi, Japanimi Adventure Travel World Summit™ naalisarlugu ATWS-imik taaneqartartumi, Oslomi AECO, Reykjavikkimi VestNorden Travelmart aamma Arctic Circle Assembly peqataaffigineqarsimapput.
Taakkua saniatigut sumiiffiit tikikkuminarsarneqarneranni Aasianni aqquserngit skiltilersorneqarnissaat aamma naammassineqarpoq.
Namminersorlutik aallarnisartunut innuttaasunullu aqqutissiuussineq
Qeqertalik Business Council kingumut ukioq 2023-mi aallarnisaasunut innuttaasunullu iluaqutaasunik pikkorissaanernik, workshopinillu arlaleriarluni aaqqissuussaqarsimavoq.
Inuussutissarsiutitigut siunnersuisoqarfiup piginnaanngorsaaneq periusissiaminni pingaarutilittut ingerlataraat. Taamaammallu ilaatigut innuttaasunut pikkorissaanerit assigiinngitsut ingerlattarsimavaat, assersuutigalungu ingerlatsinermut pilersaarusiorneq, missingersuusiorneq, aningaasaqarnikkut aqutsineq aammattaaq akileraartariaaseq, aallarnisaanermut iluaqutissiatut pikkorissaatigisarpaat. Sullissinermut kiffartuussinermut, nioqqutissanillu ingerlatsinermut ilinniartitsisoqarsimavoq. Aningaasaateqarfinnut tapiissutinik qinnuteqaasiornerit pillugit ilaatigut peqatigiiffinnut ilinniartitsisoqarsimavoq, workshoppimilu katersorneqarsimallutik, matumani peqatigiiffiit iluminni ingerlariusaat kiisalu peqatigiiffiit akimorlugit suleqatigiilluarnerulersinnaaneq siunertarineqarluni.
Ataatsimeersuarneq 2024
Ileqquusumik ataatsimeersuarnermi Borgmesteri Kommunaldirektøri Kommune Qeqertalik piginnittuusoq sinnerlugu, taamatuttaaq ingerlatseqatigiiffiup siulersuisui pisortaaneralu ataatsimeersuarnermi peqataasimapput.
Ukioq 2023-mi naatsorsuutit qiviaraanni ingerlatseqatigiiffik 362.811 koruniinik sinneqartooruteqarpoq, ukiup siuliani 122.904 koruuninik sinneqartooruteqarsimalluni. Erseqqissaatigineqartariaqarpoq sinneqartooruteqarnissaq matumani siunertaanngimmat, ingerlatseqatigiiffik sullissinermik isumaqatigiissut naapertorlugu kommuunemit aningaasaliiffigineqartarmat, isumaqatigiissutip imarisaasa piviusunngortinneqarnissaat siunertaralugu. Siunertarineqarporlu aningaasaliissutit amerlanerit kommunetta iluani inuussutissarsiornermut takornariaqarnermullu inerisaanermut atorneqassasut.
Ataatsimeersuarnermi kingumut Hanne Kristiansen, Anuni-mi piginnittoq, INUIT Quality Clothes Of Greenlandimilu pisortaaneq Siulersuisuni Siulittaasutut qiningaavoq. Tine Pars, 22. November 2023-imi ataatsimeersuarnermi siulittaasup tulliatut qinigaasoq siulersuisut siulittaasuattut ingerlaqqippoq. Siulersuisuni ilaasortat Hans-Jørgen Mørch aamma Kristian Lyberth qiningaaqqipput, Hans Arkalo Lyberth Didriksenilu GE Qasigiannguit sinnerlugu toqqarneqarpoq. Søren Hansenilu GE Aasiaat Kangaatsiarlu sinnerlugit toqqarneqarluni. Kristian Lyberth GE Qeqertarsuaq sinnerlugu toqqarneqaqqilluni ingerlaqqippoq.
Pilersaarutigineqarsimasutut ileqquusumik ataatsimeersuarnermi kukkunersiuisut peqataatinneqarput, naatsorsuutinillu toqqaannaq saqqummiisinneqarlutik.
Siulersuisut kissaatiginikuuaat siunissami ataatsimeersuarnerit nittartakkatigut malinnaavigineqarsinnaanngorlugit ingerlanneqartassasut, tamannalu matumani ataatsimeersuarnermi siunertaasimagaluarpoq. Teknikkikkulli ajornartorsiuteqartoqarnera pissutigalugu ataatsimeersuarneq toqqaannartumik aallakaatinnagu immiunneqarsimavoq.
Ataatsimeersuarnerullu immiunnera uani takusinnaavat: